Туркиянинг Анталия шаҳрида ўтказилган VIII Бутунжаҳон болалар жарроҳлиги конгресси (WOFAPS-2025)да Самарқанд давлат тиббиёт университетининг ихтисослаштирилган болалар жарроҳлиги клиникаси врачлари ҳам иштирок этди.

Бутунжаҳон болалар жарроҳлари ассоциациялари федерацияси (WOFAPS) томонидан Туркия болалар жарроҳлари ассоциацияси (TAPS) билан ҳамкорликда ташкил этилган конгресс сайёрамизнинг барча қитъалардан малакали болалар жарроҳлари, етакчи мутахассисларни бир даврада бирлаштирди. Улар бугун ер юзида ресурслар чекланиб, турли хил касаллик ва эпидемиялар кўпайиб бораётган шароитда юзага келаётган муаммоларга биргаликда ечим топиш, болалар жарроҳлигида глобал ҳамкорлик ва тажриба алмашиш ҳар қачонгидан ҳам муҳимлигини таъкидладилар.

– Дунёдаги болалар хирургияси бўйича нуфузли клиникалар вакиллари, таниқли олимлар иштирок этган бу галги конгресда болалар жарроҳлигининг лапароскопия, неонатал жарроҳлик, онкология, микрожарроҳлик йўналишлари бўйича кўплаб маърузалар тингланди, соҳадаги сўнгги янгиликлар ва даволаш усуллари ҳақида тақдимотлар қилинди, – дейди Самарқанд давлат тиббиёт университетининг ихтисослаштирилган болалар жарроҳлиги клиникаси бош врачи, профессор Жамшид Шамсиев. – Бунда кам инвазив технологиялардан тортиб, неонатал жарроҳлик, онкология ва жарроҳлик этикасигача эътибор қаратилди. Конгресс давомида клиникамиз мутахассислари билан бирга турли мавзулар бўйича олтита маъруза тақдим эдик. Ўз чиқишларимизда мамлакатимизда, жумладан, Самарқандда кейинги йилларда болалар хирургияси бўйича эришилган натижалар, халқаро ҳамкорлик, амалга оширилаётган илмий тадқиқотлар ҳақида маълумот бердик. Бизнинг чиқишларимиз хорижлик ҳамкасбларимиз томонидан катта қизиқиш билан қабул қилинди ва ўзаро ҳамкорлик қилиш, тажриба алмашишга келишиб олдик.  

Халқаро форум сессияларидан бирига профессор Ж.Шамсиев раҳбарлик қилди ва бу унинг тажрибаси, профессионал обрўси конгресс ташкилотчилари томонидан эътироф этилишининг ёрқин ифодаси бўлди.

Ғ.Ҳасанов, ЎзА мухбири