Yurtimizda har yil an’anaviy tarzda o‘tkazib kelinayotgan «Yoshlar oyligi»ning bu yilgi eng yirik loyihalardan biri Butunjahon yoshlar festivali bo‘ldi.

Mazkur festival chin ma’noda 100 ga yaqin davlatdan tashrif buyurgan xorijlik mehmonlarning ham ko‘nglidan joy oldi. Ular hali hanuz festival davomida olgan taassurotlari bilan o‘rtoqlashmoqda. 

Jezus Silva (Dida) – Jahon futbol afsonasi:

– Bu tashkillashtirilgan tadbir judayam yaxshi o‘tdi. Bizning mamlakatda bunday tadbirlar kamdan-kam hollarda o‘tkaziladi. Festivalda mehmonlar o‘zlarining yoshlik davrlarini yodga olarkan, ko‘plab qiyinchiliklarga, og‘ir sinovlarga duch kelishgani, bu esa ularning yanada yetuk sportchi bo‘lishida katta ahamiyatga ega bo‘lganligini ta’kidlashdi. Bu yoshlarga yaxshi motivatsiya beradi va ulardan kelajakda katta-katta futbolchilar yetishib chiqadi. O‘zbekistonni yoshlar mamlakati deb atasak yanglishmaymiz. Biz yana do‘stlarimiz bilan kelamiz.

Abduraxman Al Kadiri – Qatar "Al Araby TV" kanali jurnalisti:

– Yoshlar festivalida qatnashish menda unutilmas taassurot qoldirgan ajoyib tajriba bo‘ldi. Dunyo bo‘ylab ko‘plab yosh iste’dodlar bilan uchrashish haqiqatan ham ilhom baxsh etdi. Ushbu festival bizni birlashtirish va har bir sohamizni yaxshilash uchun fikrlarimiz, tajribalarimiz va qarashlarimiz bilan bo‘lishish uchun noyob platformani taqdim etdi. G‘oyalarning xilma-xilligi hayratlanarli edi va biz hammamiz umumiy maqsadni baham ko‘rishimiz aniq edi.

Festivalning eng e’tiborli jihatlaridan biri, O‘zbekistonning boy madaniyati bilan tanishish imkoniyati bo‘ldi. Mamlakat go‘zalligi, xalqining iliqligi va mehmondo‘stligi bilan birgalikda unutilmas taassurot qoldirdi. O‘zbekistonning jonli an’ana va urf-odatlaridan tortib, ajoyib arxitektura va landshaftlarigacha bo‘lgan madaniy merosi maftunkordir. Mamlakat tarixi, san’ati va milliy taomlari haqida bilish va bu elementlarning o‘z xalqining kundalik hayotida qanday ahamiyatli ekanligini ko‘rish juda qiziqarli edi.

Turli sohalardagi yosh mutaxassislar bilan hamkorlik qilish tarmoqlararo hamkorlikning muhimligi, festivalning seminarlari va yalpi muhokamalari bizga texnologiya va tadbirkorlikdan tortib san’at va ekologik barqarorlikka qadar turli mavzularni o‘rganishga imkon berdi.

Har bir sessiya o‘rganish imkoniyati bo‘lib, global muammolar va ularni hal qilish uchun ishlab chiqilayotgan innovatsion yechimlar haqidagi tushunchamizni kengaytirdi. Ushbu o‘zaro ta’sirlardan olingan tushunchalar nafaqat mening professional sayohatimni boyitdi, balki ijodkorlik va taraqqiyotni rivojlantirishda turli istiqbollarning ahamiyatini kuchaytirdi. Yoshlar festivali shunchaki tadbir emas edi. Bu yoshlar salohiyatining bayrami va yoshlarning birlashganda nimaga erishish mumkinligidan dalolat edi.

Men qilgan muloqotlar va tajribalarim, shubhasiz, kelajakdagi harakatlarimni shakllantiradi. Bunday dinamik va qo‘llab-quvvatlovchi jamiyatning bir qismi bo‘lish mening ijobiy o‘zgarishlarga hissa qo‘shish ishtiyoqimni kuchaytirdi va menga yangi maqsad tuyg‘usini berdi. Yoshlar festivali yoshlar bilan hamkorlik va madaniy almashinuvning kuchini ko‘rsatgan ajoyib tajriba bo‘ldi.

Zubair Junjunia – «ZNotes» platformasi asoschisi:

– Butunjahon yoshlar festivalining bir qismi bo‘lib, Toshkentdagi Yoshlar ijod saroyida so‘zlash imkoniyatidan mamnun bo‘ldim. «ZNotes» platformasiga qanday qo‘shilishlarini va o‘zlarining ijtimoiy tashabbuslarini qanday boshqarishlarini so‘rab, men bilan suhbatlashish uchun kelgan yoshlarning ajoyib ishtiroki va ishtiyoqidan juda xursand bo‘ldim. Prezident yoshlarga tabrik yo‘lladi, biz ajoyib konsert namoyishiga guvoh bo‘ldik. Men dunyoning bunday ajoyib qismlarini ziyorat qilish va boy madaniyatlarga sho‘ng‘ish imkoniyatiga ega bo‘lganimdan juda minnatdorman.

Ernist Umetaliyev – «D-Billions» platformasi asoschisi:

– O‘zbekistonga butun jamoa bilan kelishni anchadan buyon reja qilib kelar edik. Nihoyat shu kunlar Butunjahon yoshlar festivaliga to‘g‘ri kelgani bizni rosa quvontirdi. Biz shunchaki ishtirok etish emas, balki o‘zbekistonlik bolajonlar uchun ham maxsus konsert dasturi hamda uchrashuv tashkil etish niyatida edik. Tashkilotchilarga bizga bunday imkoniyat taqdim etganlari uchun o‘z minnatdorchiligimizni bildiramiz. Alisher Navoiy nomidagi Kinochilar uyida o‘zbekistonlik bolajonlar uchun maxsus konsert hamda muloqot dasturimiz biz kutgandanda ziyoda kechdi. Bu yerda bizning ko‘plab muxlislarimiz bor ekanligiga amin bo‘ldik. Yoshlar forumining yopilish marosimidagi ishtirokimiz katta sahnadagi ilk chiqishimizdir. Bizning «D-Billions» jamoamizni O‘zbekistonga taklif qilishganidan minnatdormiz. Mamlakatingizda ko‘plab muxlislarimiz bor ekanligi bizni quvontiradi. To‘liq konsert dasturimiz bilan O‘zbekistonga kelishga va’da beramiz.

Yan Veychers – Youtube platformasini monetizatsiyalashtirish bo‘yicha ekspert:

– O‘zbekistonning men bo‘lgan ko‘plab rivojlangan davlatlarga qaraganda bunchalik go‘zal va xavfsiz ekanligini, bu yerda yoshlarni qo‘llab-quvvatlash uchun bu qadar ko‘p imkoniyatlar yaratilganini o‘ylamagan edim. Yoshlar agentligi bilan hamkorligimiz doirasida biz Youtubeni monetizatsiya qilish ustida ishlayapmiz va ishonchim komilki, bu kreativ soha mutaxassislarini, xususan ijodkorlar – kontent yaratuvchilarni yanada qo‘llab-quvvatlaydi. Chunki bu sohadagi odamlarga pul to‘laydi. Yaxshi kontent va katta ko‘rishlar soni uchun. Agar raqamlar haqida gapiradigan bo‘lsak, 3 yil ichida Youtube butun dunyo bo‘ylab ushbu platformada kontent yaratgan va ko‘plab ko‘rishlar orttirganlarga 3 milliard dollardan ko‘proq mablag‘ to‘lagan va bu degani bir necha ming dollardan bir necha milliongacha o‘zbekistonlik kontent yaratuvchilariga potensial pul to‘lovlari amalga oshirilgan.

Alper Gezeravchi – Turkiyaning birinchi kosmonavti, astronavti:

– Avvalambor, ota yurtimiz bo‘lgan O‘zbekistonga taklif qilganingiz uchun minnatdorlik bildiraman. Bu tashrifim davomida O‘zbekistonda yoshlarga berilayotgan imkoniyatlar meni quvontirdi. Meni hayratga solgan taraflari juda ko‘p. Bulardan biri yosh olimlar fazogirlar birlashmasi bo‘ldi. Men har bir seminarlarimda endi fazoga uchish Turkiy davlatlar yoshlarining xayol qila oladigan bir orzusi ekanligini aytib boraman. O‘zbekistonda bu narsani ko‘ra oldim. Yoshlarimiz uchun bunday tashkilotlarning bo‘lishi kelajakda O‘zbekistondan ko‘plab fazogirlarning yetishib chiqishiga ishonchim komil.

Aslini olganda, dunyoga bizning otalarimiz fazo bilimlarini o‘rgatgan allomalardir. Bizning qonimizda ajdodlarimizning qoni bor, ya’ni ularning yo‘lidan yurishimiz uchun davlat miqyosida ko‘pgina ishlar amalga oshirilayotganligiga guvoh bo‘ldim. Bolalarga maktab davridan kosmik bilimlarning berilishi kelajakda yetuk fazogirlar chiqishiga xizmat qiladi. O‘zbekiston Respublikasi Prezidenti tarafidan tashkil etilgan “O‘zbekkosmos” agentligi ilg‘or loyihalarni amalga oshirayotganini ko‘rdim. Bir necha yildan keyin O‘zbekiston ham o‘z kosmonavtini kosmosga uchirishiga aminman. O‘zbekistonga bundan avval Turk havo yo‘llari tashkiloti uchuvchisi sifatida bir necha bor kelganman. Bu safar kosmonavt sifatida tashrifim davomida O‘zbekistonning kosmos borasida olib borayotgan ishlari kutganimdan ham yuqori bo‘lib chiqdi.

Abdullaziz Abdulraxman – Almasayedning Saudiya Yoshlar va sport vaziri o‘rinbosari:

– Festival yuqori darajada sifatli va hayajonli – yoshlarning ma’naviy rivojlanishi uchun muhim ahamiyatga ega bo‘ldi. Tadbir davomida yoshlarga turli madaniyatlar bilan tanishish va ularni qadrlash imkoniyati yaratildi. Shuningdek, ular o‘z madaniy meroslarini namoyish etishlari va boshqa davlat yoshlari bilan tajriba almashishlari mumkin bo‘ldi. Mening fikrimcha, festival yoshlar o‘rtasida fikr va g‘oyalar almashinuvi uchun samarali platforma hisoblanadi. Bu esa yoshlar o‘rtasida innovatsion fikrlash va yangi yondashuvlarni rivojlantirishga yordam beradi.

Gulnoza Boboyeva, O‘zA