Ғарбий Африкадаги Буркина-Фасо мамлакатида давлат тўнтаришини амалга ошириш ҳаракати фош этилган.

“Ўтиш даври ҳукумати жамоатчиликка 26 сентябрь куни разведка кучлари ёрдамида давлат тўнтаришининг олди олинганини маълум қилади”, дейилган баёнотда.

Қўшимча қилинишича, куч ишлатар тизим вакиллари томонидан исёнга уринишда гумон қилинган бир неча ҳарбий ва бошқа шахслар ҳибсга олинган, қолганлар қидирилмоқда.

Аввалроқ “Burkina24” портали ўтиш даври ҳукумати қўллаб-қувватланган намойиш уюштирилгани ҳақидаги хабар берган эди. Айрим манбалар эса сешанба куни Буркина-Фасода ўтиш даври ҳукуматига қарши қаратилган “давлат тўнтариши”га уриниш хусусида ёзган.

Ўтган йил сентябрь ойида капитан Иброҳим Траоре раҳбарлигидаги бир гуруҳ ҳарбийлар ўтиш даври ҳукумати раҳбари подполковник Поль-Анри Сандаого Дамиба ҳукумат раҳбарлигидан озод этилгани ҳақида билдирган. Ўшанда Дамиба агар исёнчилар бир неча шартни бажарса, ўз ихтиёри билан истеъфога чиқишга тайёрлигини айтган.

Соҳил минтақасида жойлашган Буркина-Фасо 2015 йилдан буён радикал жиҳодчилар ҳужумига учраб келмоқда.