Андижон вилояти Булоқбоши туманидаги 102 та фермер хўжалиги томонидан жорий йилда 2 минг 629 гектар ер майдонига пахтанинг “Андижон-35” нави экилган эди. Белгиланган агротехник тадбирларнинг ўз вақтида сифатли ўтказилганлиги, деҳқонларнинг самарали меҳнатлари эвазига пахтадан мўл ҳосил етиштирилди.

“Xo’jaobod Fayz-M” масъулияти чекланган жамияти  пахта тўқимачилик кластер корхонаси билан 102 та фермер хўжаликлари ўртасида 9 минг 504 тонна пахта хомашёсини етказиб бериш бўйича шартномалар тузилган бўлиб, белгиланган режани бажариш учун йил давомида самарали меҳнат қилинди.  

Йиғим-терим ишларини уюшқоқлик билан ўтказиш учун терим отряди шакллантирилди. Бугунги кунга қадар туман пахтакорлари томонидан давлат омборларига 9 минг 519 тоннадан зиёд пахта топширилди. Туман вилоятда биринчи бўлиб белгиланган шартнома режасини ортиғи билан бажарди. Ҳосилдорлик ўртача 38 центнерни ташкил этди.  

Далаларда ҳосил мўл, булоқбошилик пахтакорлар пахтанинг бир мисқолини ҳам қолдирмай териб олиб, ҳосилдорликни 40 центнерга етказишни режалаштирган.

Ф. УБАЙДУЛЛАЕВ, ЎзА