Интернет майдонида тарқалаётган букмекерлик ва қимор тарғиботи нафақат ёшларни чалғитади, балки жамиятнинг иқтисодий ва маънавий барқарорлигига ҳам салбий таъсир кўрсатади. Шундай шароитда зарарли контентга нисбатан тизимли чоралар кўрилиши жуда долзарб.

Рақобат қўмитасининг бу борадаги фаол назорати жамоатчилик манфаатини ҳимоя қилишдаги муҳим қадам. Рақобат қўмитаси томонидан қимор ва таваккалчиликка асосланган ўйинларни тарғиб қилишга қаратилган веб-сайтлар юзасидан доимий ўрганиш ва таҳлиллар олиб борилмоқда.

Рекламага оид қонунбузилишларга нисбатан тезкор чоралар кўриш мақсадида тегишли ташкилотлар билан ҳамкорлик йўлга қўйилган.

Бунда букмекерлик хизматларига оид рекламани тарғиб қилувчи веб-сайтларга киришни чеклаш (блоклаш) чоралари кўрилмоқда.

Хусусан, жорий йилнинг ўтган вақтида амалга оширилган ишлар натижасида букмекерлик хизматларни тарғиб қилувчи 86 та веб-сайтни блоклаш бўйича Тегишли назорат органига маълумотлар киритилди. Шундан 70 га яқин сайтлар белгиланган тартибда блокланган.

Ўзбекистон Республикаси "Реклама тўғрисида"ги қонунининг 46-моддасига мувофиқ, қимор ўйинлари ва таваккалчиликка асосланган бошқа ўйинлар рекламаси тақиқланади.  

Қўмита томонидан бу йўналишдаги мониторинг ишлари тизимли давом эттирилмоқда.  

Нигора Раҳмонова, ЎзА