Бухорода 15 мингдан ортиқ тиббиёт ходими фаолият юритмоқда
Вилоятда жами уй карантинига олинганлар сони эса 2823 нафар бўлиб, уларнинг оила аъзолари 8945 нафарни ташкил этади.
Коронавирус инфекциясининг кириб келиши ва тарқалишининг олдини олиш бўйича Бухоро вилояти штабининг маълумотларига кўра, юртимизда карантин эълон қилинган кундан буён вилоятда жами 9931 нафар фуқаро карантинга олинган. Жорий йилнинг 8 апрель ҳолатида, 8634 нафари карантиндан чиқарилган. Айни пайтда карантинда турганлар 1297 нафар.
Вилоятда жами уй карантинига олинганлар сони эса 2823 нафар бўлиб, уларнинг оила аъзолари 8945 нафарни ташкил этади.
Вилоят соғлиқни сақлаш бошқармасининг билдиришича, шаҳар ва туманларда 14 та тиббиёт муассасаларида, шунингдек, хориждан қайтиб келган фуқаролар учун обсервация карантин ўринлари шакллантирилди. Ушбу ўринлар яъни махсус карантин пунктлари вилоят кардиология диспансери, вилоят кўз касалликлари шифохонаси, “Жўйзар” санаторияси, вилоят болалар физиатрия сиҳатгоҳи ҳамда шаҳардаги Варахша, Гранд, Турон меҳмонхоналарда ташкил этилди. Вилоятда 1254 та махсус ўринлар яратилди ва керакли миқдорда дори-дармон, тиббий воситалар билан таъминланди.
Ҳозир кунда вилоятдаги касалхона ва махсус карантин пунктларида 834 нафар фуқаролар карантинга олинган.
Карантин шароитида аҳолига тиббий хизмат кўрсатиш учун 15 минг нафардан ортиқ тиббиёт ходимлари фаолият олиб бормоқда. Уларнинг 500 нафари карантинга олинган шахсларга тиббий ёрдам кўрсатмоқда.
Бундан ташқари вилоятда ташкил этилган 122 та дезинфекция гуруҳлари томонидан 36 мингтага яқин объект дезинфекция қилинди.
Вилоят “Дори-дармон“ МЧЖ омборхонасида 2740 дона спирт, 120170 дона маска, 39530 дона қўлқоп ҳамда 1666 кг перекис-водород, 17849,5 кг гипохлорид калций мавжуд.