АОКАда ўтказилган брифингда Кадастр агентлиги ахборот хизмати раҳбари Неъмат Атамуратов “Ўзбошимчалик билан эгаллаб олинган ер участкаларига ҳамда уларда қурилган бинолар ва иншоотларга бўлган ҳуқуқларни эътироф этиш тўғрисида”ги қонунга асосан жойларда ўтказилаётган хатлов ишлари борасида маълумот берди.

Хатлов ишлари икки босқичда – дала ишлари ҳамда камерал ишлар кўринишида амалга оширилмоқда. Дала ишларида кадастр муҳандислари томонидан ҳар бир кўчмас мулкнинг бино-иншоотларини ўлчаш билан бир қаторда уларнинг конструктив элементларини ҳамда ер участкаларининг амалдаги чегараларини аниқлаш амалга оширилади.  

Шунингдек, хатловга топографлар ҳам жалб қилиниб, геодезик ускуналардан фойдаланган ҳолда объектнинг аниқ географик жойлашувини аниқлаш ва электрон хариталарини яратиш ишлари ҳам олиб борилмоқда.  

Камерал ишларда дала ишлари натижаларини тўплаш, таҳлил қилиш, бино-иншоотлар чизмалари ва ер участкаси чегараларини чизиш, топографик хариталарни яратиш ишлари амалга оширилади. Бугунги кунга қадар 125 минг 131 та кўчмас мулк объекти хатловдан ўтказилди.  

Ишчи гуруҳ томонидан 41 минг 790 та кўчмас мулк объектини UZKAD тизимига олиб ўтиш (миграция) лозим деб топилди. 13 минг 220 та кўчмас мулк объектининг хатлов жамланмаларини кўриб чиқиш ишлари олиб борилмоқда.  

Хатлов жамланмалари тўлиқ шакллантирилган 36 минг 282 та кўчмас мулк объекти UZKAD тизимига олиб ўтилди. Шундан, қонун доирасида ҳал этилиши мумкин бўлган 11 минг 353 та кўчмас мулк объектининг электрон йиғма-жилдини кўриб чиқиш учун “E’TIROF” ААТ орқали тегишли вазирлик ва идораларга юборилди.  

Хатлов ишларида аввал ўтказилган хатловларда йўл қўйилган хато ва камчиликлар такрорланишининг олдини олиш мақсадида янгича ёндашув асосида зарур чора-тадбирларни амалга ошириш зарурияти юзага келди. Хусусан, маҳаллалар чегаралари аниқ белгиланмагани сабабли 2024 йилда хатлов ўтказиш режалаштирилган 914 та маҳалла чегараларига аниқлик киритилди.  

Ҳар бир кўчмас мулк объектини ўз маҳалласи ҳудудига аниқ жойлаштириш, хатлов ўтказилаётган ҳудудда объект қолиб кетмаслиги учун 12 минг 620 та полигонга ажратиб чиқилди. Мулкка бўлган ҳуқуқларни эътироф этишда объектнинг ҳақиқий эгаларини аниқлаш муҳим аҳамиятга эга эканини инобатга олиб, хатлов жараёнида кадастр ходимлари томонидан жойида объект ва унинг ҳақиқий эгасини аниқлаш имконини берувчи мобил илова ишлаб чиқилди.  

Шу билан бирга, хатлов ишлари бошлангани ҳақида барча маҳалла раислари, фаоллари бир неча бор хабардор қилинган бўлсада, айрим маҳаллаларда кўчмас мулк эгалари манзилда бўлмасликлари бир қатор қийинчиликлар туғдирмоқда.    

Яъни, битта объектга бир неча бор такрор боришга ва ортиқча вақт йўқотилишига сабаб бўлмоқда. Кадастр агентлиги томонидан тасдиқланган режа-график асосида жойларда хатлов ишлари давом этмоқда. Юртдошларимиз мазкур режа-график билан kadastr.uz сайти орқали танишишлари мумкин.    

Ш.Маматуропова,  

ЎзА