Саудия Арабистони мезбонлик қилаётган VI Ислом бирдамлиги ўйинларининг навбатдаги кунида Ўзбекистон делегацияси 3 та олтин, 4 та кумуш ва 4 та бронза медалига эга чиқди.

Ҳусусан, енгил атлетика бўйича узунликка сакраш йўналишида Анвар Анваров олтин медалга эга чиққан бўлса, қиличбозликнинг жамоавий рапира беллашувларида эркаклар терма жамоамиз, шпагада аёллар термамиз биринчи ўриндан жой олди.

Шунингдек, Светлана Оқназарова аёллар кураши (-68 кг), Ўғилой Норбоева кўпкурашда кумуш медалга эга чиқди. Қиличбозликнинг сабля йўналиши бўйича Ўзбекистон аёллар ва эркаклар терма жамоаси кумуш медаль билан тақдирланган бўлса, пара найза улоқтиришда Наталя Семёнова, эркин курашда Ғуломжон Абдуллаев (-57 кг) ва Умиджон Жалолов (-65 кг), аёллар кураши бўйича Нигина Собирова бронза медалига эга чиқди.

Ушбу натижадан сўнг, Ўзбекистон делегацияси 29 олтин, 34 кумуш ва 30 бронза жами 93 та медаль жамғарган ҳолда умумжамоа ҳисобида иккинчи ўриндан жой олмоқда. Ушбу жадвалда Туркия 71 та олтин, 44 та кумуш ва 35 та бронза медаль билан карвонбошилик қилаётган бўлса, эронлик спортчилар 25 та олтин, 19 та кумуш, 30 та бронза медалига эга чиқиб, учинчи ўринда қайд этилди.

Бугун, 21 ноябрь куни VI Ислом бирдамлиги ўйинларининг сўнгги кунида вакилларимиз жиу житсу, пара пауэрлифтинг ва эркин кураш каби спорт турларида чиқиш қилади.

Жавоҳир Тошхўжаев,

ЎзА