Ўзбекистон халқ шоири Хуршид Даврон 1952 йил 20 январда Самарқанд вилоятида туғилган.
Хуршид Даврон Тошкент давлат университетининг (ҳозирги ЎзМУ) журналистика факультетини тугатган. У меҳнат фаолияти давомида турли нашриётларда, Республика Маънавият ва маърифат жамоатчилик маркази ҳамда Ўзбекистон Миллий телерадиокомпаниясида хизмат қилди.
Шоирнинг “Шаҳардаги олма дарахти”, “Тунги боғлар”, “Учиб бораман қушлар билан”, “Тўмариснинг кўзлари”, “Болаликнинг овози”, “Қақнус”, “Баҳордан бир кун олдин”, “Бибихоним” сингари китоблари ўқувчиларга яхши таниш.
Хуршид Давроннинг аждодларимиз ҳаёти ва фаолияти ҳақидаги бир қатор драматик асарлари эътиборга молик. Ижодкорнинг “Бобуршоҳ” асари “Бобур соғинчи” номи билан Муқимий номидаги ўзбек давлат мусиқий театрда саҳнага қўйилди. “Алғул ёки Мирзо Улуғбек” драмаси 2008 йили дастлаб радиоспектакль, кейинчалик телевизион спектакль сифатида намойиш этилди. Булардан ташқари, “Темурнома” номли телесериал, “Жалолиддин Хоразмшоҳ” номли телеспектакль, шунингдек, “Бухоройи шариф” фильм-операси, “Минг бир ривоят” телелойиҳаси Хуршид Даврон сценарийлари асосида яратилди. У Мирзо Улуғбек таваллудининг 600 йиллиги, Амир Темур таваллудининг 660 йиллиги муносабати билан Самарқанд шаҳрида, Бухоро ва Хива шаҳарларининг 2500 йиллигига бағишлаб Париждаги ЮНЕСКО қароргоҳида ўтказилган театрлаштирилган томошалар ва яна халқаро “Шарқ тароналари” мусиқа фестиваллари сценарийлари муаллифи ҳамдир.
Хуршид Даврон “Дўстлик” ордени ҳамда Халқаро “Олтин қалам” миллий мукофоти билан тақдирланган.
***
PS: Сайтимизда ташкил этилган “Бугун туғилган кун” лойиҳасида турли соҳаларда мамлакатимиз равнақига ўз ҳиссасини қўшган ва қўшаётган инсонлар, давлат ҳамда жамоат арбоблари, академиклар, эл севган ижодкорлар ҳамда касби, танлаган йўлида юқори натижаларга эришаётган ватандошларимизнинг туғилган кунлари ёдга олинади.
Мазкур рукнга оид фикр-мулоҳазаларингиз, таклиф ёки қўшимчаларингиз бўлса, қуйидаги манзилларга мурожаат қилишингиз мумкин.
Телеграм: @UzA_pochta, @muloqotpochta_bot
E-mail: pochta@uza.uz, uzauz@yandex.ru
Телефон: (71) 233-42-84, (71) 233-21-37
Сайтимизни кузатиб боринг!