Samarqand viloyati hokimi Erkinjon Turdimov 1969 yil 10 iyul kuni Samarqand viloyati Qo‘shrabot tumanida tug‘ilgan.

U 1991 yilda Toshkent xalq xo‘jaligi institutini (hozirgi Toshkent davlat agrar universiteti) iqtisodchi mutaxassisligi bo‘yicha tamomlagan.

Mehnat faoliyatini 1991 yilda «O‘zsanoatqurilishbank»ning Sirdaryo filialida bo‘lim mutaxassisi sifatida boshlab, o‘tgan yillarda qator mas’ul lavozimlarda ishlagan. Xususan, «O‘zsanoatqurilishbank»ning Zarafshon bo‘limi pul muomalasi bo‘limida bosh mutaxassis, bo‘lim boshlig‘i o‘rinbosari, Zarafshon bo‘limi boshqaruvchisi bo‘lib ishlagan. 1995 – 1996 yillarda Zarafshon shahar hokimining iqtisodiyot masalalar bo‘yicha o‘rinbosari bo‘lgan. 1996 yildan 2000 yilgacha O‘zbekiston Milliy banki Navoiy bo‘limi boshqaruvchisi, 2000 – 2008 yillarda Navoiy viloyati Xatirchi tumani hokimi sifatida faoliyat yuritgan. 2008 yilda O‘zbekiston Respublikasi Qishloq va suv xo‘jaligi vazirining (hozirda Qishloq xo‘jaligi vazirligi va Suv xo‘jaligi vazirligi, ya’ni alohida) birinchi o‘rinbosari bo‘lib ishlagan.

2008 – 2016 yillarda Navoiy viloyati hokimi bo‘lib ishlagan. 2016 yil dekabridan 2018 yilning yoziga qadar Surxondaryo viloyati hokimi sifatida faoliyat ko‘rsatgan.

2019 yil 11 yanvar kuni Samarqand shahrida xalq deputatlari viloyat kengashining navbatdan tashqari sessiyasi bo‘lib o‘tdi. Sessiyada tashkiliy masala ko‘rildi. 2018 yil 13 iyuldan beri Samarqand viloyati hokimi vazifasini vaqtincha bajarib kelayotgan Erkinjon Turdimovning lavozimidan «v.b.» qo‘shimchasi olib tashlandi va u viloyat hokimi etib rasman tasdiqlandi.

Erkinjon Turdimov «Mehnat shuhrati» ordeni bilan taqdirlangan. O‘zbekiston Respublikasi Oliy Majlisi Senati a’zosi hisoblanadi.  

Saytimizda tashkil etilgan «Bugun tug‘ilgan kun» loyihasida turli sohalarda mamlakatimiz ravnaqiga o‘z hissasini qo‘shgan va qo‘shayotgan insonlar, davlat hamda jamoat arboblari, akademiklar, el sevgan ijodkorlar hamda kasbi, tanlagan yo‘lida yuqori natijalarga erishayotgan vatandoshlarimizning tug‘ilgan kunlari esga olinadi.  

Mazkur ruknga oid fikr-mulohazalaringiz, taklif yoki qo‘shimchalaringiz bo‘lsa, quyidagi manzillarga murojaat qilishingiz mumkin.  

Telegram: @UzA_pochta, @U_Qurbonov

E-mail: pochta@uza.uz, uzauz@yandex.ru