«Ўрта Осиё археологияси ва давлатчилиги тарихи» номли илмий мактаб асосчиси, тарих фанлари доктори, профессор, академик Анатолий Сагдуллаев 1951 йил 15 июнда Қашқадарё вилояти Китоб туманида туғилган.

Анатолий Сагдуллаев 1968–1973 йилларда Тошкент давлат университети (ҳозирги Ўзбекистон Миллий университети) Тарих факультетининг Ўрта Осиё археологияси кафедрасида таълим олган.

Меҳнат фаолиятини ушбу университетда бошлаган. У илмий тадқиқотлар билан бир қаторда турли йилларда катта ўқитувчи, доцент, Тарих факультети декани, профессор ва Археология кафедраси мудири вазифаларини бажариб, ўз умрини самарали педагогик фаолиятга бағишлаган.

Олим нафақат олий ўқув юртлар талабалари, балки ўрта таълим мактаблари ўқувчилари учун ҳам янги авлод ўқув адабиётларини яратиш ташаббускори бўлган.

Анатолий Сагдуллаев 1998–2012 йилларда Ўзбекистон Республикаси Президенти ҳузуридаги Давлат ва жамият қурилиши академияси қошидаги Ўзбекистоннинг янги тарихи маркази директори лавозимида фаолият олиб борди.

У Ўрта Осиё археологияси, маданияти ва давлатчилиги тарихи бўйича йирик мутахассис. Олим илгари Ўрта Осиё археологияси фанига номаълум бўлган ёдгорликларни кашф этган ва қадимги Бақтрия, Суғдиёна ҳудудларида кўп йиллик дала археологик тадқиқотлари натижасида топган муҳим илмий материалларни илк бор тарих фанига киритган. Бу илмий кашфиётлар ва тадқиқотлар хорижда тан олинган. У – ўз илмий мактабини яратган олим.

Анатолий Сагдуллаев – Шаҳрисабз шаҳрининг 2700 йиллигини асослаб бериш мақсадида Кеш–Шаҳрисабз воҳасида кенг кўламдаги археологик илмий-тадқиқот ишларининг ташкилотчиси ва илмий раҳбари. Унинг фаолияти кўпқиррали бўлиб, у фундаментал олим, шунингдек, 48 йиллик иш стажига эга моҳир педагог, ижодкор ва ўткир қалам соҳибидир.

Ўзбекистон Республикаси Фанлар академияси Ҳайъати ва тегишли фан ихтисосликлари бўйича фаолият кўрсатаётган ҳақиқий аъзоларининг тавсиясига асосан Ўзбекистон Республикаси Президентининг 2017 йил 29 декабрдаги «Ўзбекистон Республикаси Фанлар академиясининг ҳақиқий аъзоларини тасдиқлаш тўғрисида»ги Фармони билан Анатолий Сагдуллаев Ўзбекистон Фанлар академиясининг ҳақиқий аъзоси этиб тасдиқланди.

Олим 2020 йилда «Меҳнат шуҳрати» ордени билан мукофотланди. Ҳозирги кунда Мирзо Улуғбек номидаги Ўзбекистон Миллий университети Тарих факультети Археология кафедраси профессори лавозимида илмий-педагогик фаолиятини амалга оширмоқда.

* * *

PS: Сайтимизда ташкил этилган «Бугун туғилган кун» лойиҳасида турли соҳаларда мамлакатимиз равнақига ўз ҳиссасини қўшган ва қўшаётган инсонлар, давлат ҳамда жамоат арбоблари, академиклар, эл севган ижодкорлар ҳамда касби, танлаган йўлида юқори натижаларга эришаётган ватандошларимизнинг туғилган кунлари ёдга олинади.

Мазкур рукнга оид фикр-мулоҳазаларингиз, таклиф ёки қўшимчаларингиз бўлса, қуйидаги манзилларга мурожаат қилишингиз мумкин.

Телеграм: @UzA_pochta

E-mail: pochta@uza.uz, uzauz@yandex.ru

Телефон: (71) 233-42-84, (71) 233-21-37

Сайтимизни кузатиб боринг!