Нидерландияда шахмат бўйича давом этаётган “Tata Steel Chess” турнирининг 6-тур баҳслари бугун бўлиб ўтади.

Хабар берганимиздек, кеча норвегиялик Магнус Карлсенни мағлубиятга учратиб, “Мастерс” гуруҳида пешқадамга айланган Нодирбек Абдусатторов энди ҳиндистонлик Праггнанада билан куч синашади.  

Шунингдек, турнирнинг “Челленжер” гуруҳида 3,5 очко билан 3-ўринда бораётган яна бир истеъдодли шахматчимиз Жавоҳир Синдоров бугун 6-турда бразилиялик Луис Паулога қора доналарда қаршилик кўрсатади. 

Эслатиб ўтамиз, кеча ўтказилган 5-тур ўйинларидан кейин ҳамюртимиз Нодирбек Абдусатторов 4 очкога эга бўлган ҳолда 85 - маротаба ўтказилаётган турнирда пешқадамлик қилаётган бўлса, ундан кейинги ўринларни 3,5 очко қўлга киритган Аниш Гири, 3 очкога эга Рамешбабу Праггнананда, Фабиано Каруана и Левон Аронян эгаллаб турибди.  

Мазкур нуфузли мусобақанинг ўтган йилги ғолиби америкалик Уэсли Со ҳозирда 6-9-ўринларда бормоқда. Классик шахмат бўйича амалдаги жаҳон чемпиони Магнус Карлсен эса 10-11-ўринлардан жой олган. 

Бугун истеъдодли шахматчимиз ҳиндистонлик Рамешбабу Праггнанандани ҳам мағлуб этса, ғолиблик довонига янада яқинлашиб олади.  

Халқаро турнир мусобақалари 29 январга қадар давом этади.  

Тўлқин Рўзиев, ЎзА