“Янги Ўзбекистон”да Ўзбекистон Республикаси Президенти Шавкат Мирзиёевнинг 24 ноябрь куни Боку шаҳрида бўлиб ўтган БМТнинг Марказий Осиё иқтисодиётлари учун махсус дастури (СПЕКА) биринчи саммитида иштироки, шунингдек, ушбу саммитда сўзлаган нутқи эълон қилинган. “Биз ва дунё” рукнида берилган “Ўзбекистон СПЕКА доирасида кўп томонлама, очиқ, амалий ва ўзаро манфаатли шерикликни изчил ривожлантириш тарафдори” саҳифасида чет эллик мутахассис ва экспертларнинг Ўзбекистоннинг ушбу нунфузли анжуманда иштироки ва роли ҳақида фикр-мулоҳазалари берилган.

“Адвакатура институтининг такомиллашуви қонун ва адолат устуворлигига хизмат қилади”, “Конституциявий асосларга таяниш жамиятни ўзгартиришда муҳим аҳамиятга эга” саҳифалари тобора яқинлашиб келаётган Ўзбекистон Республикаси Конституцияси куни, Бош Қомусимизнинг ҳаётимизда тутаётган ўрни ҳақида. “Қиш яқин. Хатолар такрорланмаслиги учун амалий чоралар кўрилмоқда”, “GSP+” имтиёзлар умумий тизими Европа бозорига кириб боришнинг ишончли йўли” каби мақолаларда бугуннинг долзарб масалалари таҳлилини кўрасиз. “Янги эпидемиями ёки мавсумий шамоллаш?” мақоласини, албатта, ўқинг. Унда шу кунларда мамлакатимизда болалар орасида ўткир респиратор касалликларнинг даврий кўтарилиши юз бераётгани, кичик ёшли болаларнинг нафас йўли юқумли касалликларига чалиниш кўрсаткичи йилнинг бошқа даврларига нисбатан анчагина ортгани ва бундай вазиятда қандай йўл тутган маъқулиги хусусида мутахассис тавсиялари билан танишасиз. “Генетик сифат ўзгариши чорвачилик ривожига ижобий таъсир қилади” номли мақола ҳам ўқувчи учун қизиқ...

“Халқ сўзи”да ҳам Ўзбекистон Республикаси Президенти Шавкат Мирзиёевнинг Озарбайжон Республикаси пойтахти Боку шаҳрига амалий ташрифи – БМТнинг Марказий Осиё иқтисодиётлари учун махсус дастури (СПЕКА) биринчи саммитида иштироки, саммитда сўзлаган нутқи, шунингдек, Ўзбекистон Республикаси Олий Мажлиси Сенатининг қирқ еттинчи ялпи мажлиси тўғрисида АХБОРОТ  эълон қилинган. Таъкидлаш жоизки, ушбу дастур доирасида тижорат, коммуникация, транспорт ва ва логистика, рақамлаштириш, энергетика, сув ресурслари, экология, гендер тенглиги ва бошқа соҳаларда амалий ҳамкорликни кенгайтиришга қаратилган 400 дан ортиқ лойиҳалар ҳаётга тадбиқ этилди, савдони соддалаштириш ва инновацион ривожланиш стратегиялари қабул қилинди. “Самарқанд – глобал конференция учун муносиб манзил”, “Онкология хизматининг вертикал тизими – депуталар эътиборида”, “Аграр соҳада аҳоли бандлигини таъминлашга оид ишлар ҳолати қандай?” каби мақолалар ҳам муҳим масалаларга бағишлангани билан газетхон эътиборидан четда қолмайди.

Бугунги газеталарни ўқинг.

                                                                                                  ЎзА