Футбол бўйича Европа чемпионлар лигасининг умумий гуруҳ босқичи 6-тур учрашувлари бугун, 9 декабрь куни старт олади ва 10 декабрь кунига қадар давом этади.
Аввало мазкур тур олдидан мусобақа жадвалига эътибор қаратишни лозим топдик. Ўтган 5 та тур давомида барча ўйинларда зафар қучиб келаётган “Арсенал” 15 очко билан умумий гуруҳ босқичи жадвалида якка пешқадам бўлиб турибди. “ПСЖ”, “Бавария”, “Интер” ва “Реал Мадрид” клублари бир хил — 12 очко билан кучли бешликка кирган.
Шунингдек, “Боруссия Дортмунд”, “Челси”, “Спортинг Лиссабон”, “Манчестер Сити” ва “Аталанта” 10 очкодан тўплаб, 6–10-ўринларда қайд этилган бўлса, ҳисобида 9 очко бўлган “Ньюкасл”, “Атлетико Мадрид”, “Ливерпуль” ва “Галатасарой” жамоалари 11–14-поғоналарда, “ПСВ”, “Тоттенхэм” ва “Байер” 8, “Барселона”, “Қорабоғ” ҳамда “Наполи” 7 очко тўплаб, 15–20-ўринларни эгаллаб турибди.
Жадвалнинг 21–35-ўринларида “Марсель”, “Ювентус”, “Монако”, “Пафос”, “Юнион Сент-Жиллуаз”, “Брюгге”, “Атлетик Бильбао”, “Айнтрахт Франкфурт”, “Копенгаген”, “Бенфика” ва “Славия Прага”, “Будё-Глимт” ҳамда “Олимпиакос”, “Вильярреал” ва “Кайрат” жой олган. “Аякс” эса ҳали-ҳануз очко тўплай олмаган ягона жамоа сифатида охирги ўринда қолмоқда.
Чемпионлар лигасининг 6-турида ҳам бизни бир қатор қизиқарли учрашувлар кутиб турибди. 9 декабрь кунги баҳсларни “Кайрат” ва “Олимпиакос” жамоалари учрашуви бошлаб беради. Бу баҳс мамлакатимиз вақти билан соат 20:30 да бошланади. Шунингдек, 22:45 да “Бавария” — “Спортинг” учрашуви старт олади. 10 декабрь кунига ўтар кечаси тунги 01:00да “Монако” — “Галатасарой”, “Аталанта” — “Челси”, “Тоттенхэм” — “Славия Прага”, “Юнион Сент-Жиллуаз” — “Марсель”, “ПСВ” — “Атлетико Мадрид”, “Интер” — “Ливерпуль” ва “Барселона” — “Айнтрахт Франкфурт” учрашувларига гувоҳ бўламиз.
10 декабрда эса “Қорабоғ” — “Аякс”, “Вильярреал” — “Копенгаген”, “Брюгге” — “Арсенал”, “Ювентус” — “Пафос”, “Бенфика” — “Наполи”, “Байер” — “Ньюкасл”, “Атлетик Бильбао” — “ПСЖ”, “Реал Мадрид” — “Манчестер Сити”, “Боруссия Дортмунд” — “Будё-Глимт” клублари ўзаро рақобатлашади.
Жавоҳир Тошхўжаев, ЎзА