Шу кунларда пойтахтимиздаги “Олимпия шаҳарчаси” Якка курашлар мажмуасида бокс бўйича ўсмирлар ўртасида мамлакат биринчилиги баҳслари давом этмоқда.

Мамлакатимиз ҳудудлари ва боксга ихтисослаштирилган олий спорт мактабларининг 16 та жамоаси ёш спортчилари иштирокида 13 та вазн тоифасида ўтаётган чемпионатнинг уч кунлик саралаш жанглари ортда қолди.

270 нафар ёш боксчилар иштирокида кечаётган биринчиликда бугунгача умумий ҳисобда 182 та жуфтлик иштирокидаги баҳслар якунланди.

Бугун, 2 февраль куни чемпионатнинг тўртинчи кунида саралашнинг сўнгги баҳслари ташкил этилади.

Кун давомида иккита рингда 52 та жуфтлик қарама-қаршилигидаги жанглар бўлиб ўтади.

Эслатиб ўтамиз, чемпионатнинг ярим финал ва финал мусобақалари 5-6 февраль кунлари ўтказилади.

Т.Рўзиев, ЎзА