Бугун, 26 июль куни Ўзбекистон Республикаси Марказий сайлов комиссиясининг мажлиси бўлиб ўтди. Унда Ўзбекистон Республикаси Олий Мажлиси Қонунчилик палатаси ва маҳаллий кенгашлар депутатлари сайловига доир масала кўриб чиқилди.

Ўзбекистон Республикаси Конституцияси ва сайлов қонунчилигига кўра, парламент ва маҳаллий кенгашлар депутатлари сайлови тегишинча уларнинг конституциявий ваколат муддати тугайдиган йилда – октябрь ойи учинчи ўн кунлигининг биринчи якшанбасида ўтказилади.  

Шундан келиб чиқиб, мажлисда маълум қилинганидек, парламент ва маҳаллий кенгашлар депутатлари сайлови 2024 йил 27 октябрь, якшанба куни ўтказилади.    

Мажлисда 26 июлдан жорий йилги сайловлар бўйича сайлов кампаниясига старт берилиб, Календарь режа тасдиқланди.    

— Мазкур сайлов янги Конституциямиз белгилаб берган мутлақо янги ижтимоий-сиёсий муҳитда ўтказилади, — дейди Марказий сайлов комиссияси аъзоси Баҳодиржон Юнусов. — Биринчидан, Ўзбекистон тарихида илк бор Олий Мажлис Қонунчилик палатаси сайловлари аралаш сайлов тизими, яъни мажоритар-пропорционал тизим асосида ўтказилади. Депутатларнинг 75 нафари бевосита мажоритар тизим асосида, яъни сайловчилар аниқ шахсларга овоз бериш йўли билан, қолган 75 нафари эса пропорционал тизим бўйича сиёсий партияларга берилган овозлар асосида сайланишади. Иккинчидан, “E-saylov” ахборот тизими орқали барча даражадаги сайлов комиссиялари фаолияти, уларнинг сайлов жараёнлари иштирокчилари билан ўзаро муносабатлари тўлиқ рақамлаштирилди. Бу билан сайлов тартиботларидаги бюрократия, ортиқча вақт сарфи ва ҳужжатлар ҳаракати қисқартирилди. Учинчидан, сайлов қонунчилиги илғор демократик стандартларга мос равишда тубдан такомиллаштирилди. Жумладан, сайлов органларининг Марказий сайлов комиссияси бошчилигидаги янги тизими жорий этилди, сиёсий партиялар томонидан депутатликка номзодларни кўрсатишда аёлларнинг улуши камида 40 фоиз бўлиши белгиланди.  

Шу куни Марказий сайлов комиссияси Матбуот марказида Марказий сайлов комиссияси раиси иштирокида брифинг бўлиб ўтди.  

Марказий сайлов комиссияси раиси Зайниддин Низомхўжаев оммавий ахборот воситалари вакиллари ва брифинг иштирокчиларига Марказий сайлов комиссиясининг мажлисида парламент ва маҳаллий кенгашлар депутатлари сайловларига доир қабул қилинган муҳим қарорлар ҳақида батафсил маълумотлар берди. Сайловга тайёргарлик кўриш ва ўтказиш билан боғлиқ барча тадбирлар очиқ ва ошкора ўтказилиши таъминланиши алоҳида таъкидланди.  

<iframe width="560" height="315" src="https://www.youtube.com/embed/5PGYEEdKVkY?si=s1GARyzPhRNyzAhB" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Муҳтарама Комилова,

Аслиддин Алижонов,

Улуғбек Тўхтаев (видео),

ЎзА