Брюссель қаласында «Өзбекстан – Еуропалық Одақ» парламенттік ынтымақтастық комитетінің кезекті отырысы ұйымдастырылды. Келелі жиынға Өзбекстан делегациясы Сенат Төрағасының бірінші орынбасары Содиқ Сафоевтің жетекшілігімен қатысып, екіжақты ынтымақтастықтың қазіргі ахуалы мен стратегиялық перспективаларын жан-жақты талқылады.

Еуропалық Одақ өкілдері Өзбекстанда жүзеге асырылып жатқан ауқымды реформаларды жоғары бағалап, ортақ күн тәртібін ілгерілетуге және серіктестікті жаңа деңгейге көтеруге дайын екендерін білдірді. 

Әсіресе сауда-экономикалық ынтымақтастықты кеңейту, еуропалық инвестицияларды тарту, бірлескен кәсіпорындарды дамыту және жоғары технологиялық өндірістерді жолға қою мәселелеріне айрықша назар аударылды.

Тараптар сауда, инвестиция, қаржылық-техникалық қолдау, өнеркәсіп кооперациясы, стратегиялық маңызды материалдар өндіру, көлік, энергетика, ауыл шаруашылығы, «жасыл» және цифрлық экономика салаларындағы ықпалдастықты тереңдету жөнінде пікір алмасты. Сонымен қатар ғылым, білім және мәдени-гуманитарлық байланыстарды жандандырудың маңыздылығы атап өтілді.

Кездесу барысында адам құқықтарын қорғау, азаматтық қоғам институттарын қолдау және гендерлік теңдікті қамтамасыз ету бағытындағы өзара іс-қимыл мәселелері де күн тәртібінен тыс қалмады.

Сапар аясында Еуропалық Парламент алаңында «Реформалар және ынтымақтастық: Өзбекстан мен Еуропа одағы үшін жаңа күн тәртібі» тақырыбында дөңгелек үстел өтті. Іс-шараға Еуропа парламентінің Өзбекстан бойынша тұрақты баяндамашысы Илхан Кючюк, ЕО депутаттары, еуропалық институттар, сараптамалық орталықтар мен бұқаралық ақпарат құралдарының өкілдері қатысты.

Өзбекстан делегациясы «Өзбекстан – 2030» стратегиясы аясында жүргізіліп жатқан жаңғырту үдерістерінің нәтижелері жөнінде кеңінен ақпарат берді. Демократиялық өзгерістерді ілгерілету, экономиканы ырықтандыру, адам құқықтарын қорғау тетіктерін жетілдіру және инвестициялық ахуалды жақсарту бағытындағы нақты қадамдар атап өтілді.

Сондай-ақ аймақтағы ынтымақтастықты нығайтуға және стратегиялық серіктестікті дамытуға бағытталған ашық әрі прагматикалық сыртқы саясат ұстанымы таныстырылды. Еуропалық сарапшылар жүргізіліп жатқан реформаларды оң бағалап, Орталық Азия өңірінің ЕО үшін маңызы артып келе жатқанын жеткізді.

2025 жылғы 24 қазанда Өзбекстан мен Еуропалық Одақ арасында Кеңейтілген әріптестік және ынтымақтастық туралы келісімге қол қою сауда, инвестиция, көлік, стратегиялық ресурстар және адам құқықтары салаларындағы байланыстарды тереңдетуге берік негіз қалыптастыратыны атап өтілді.

Көлік және энергетикалық байланыстарды дамыту, соның ішінде Транскаспий көлік дәлізін ілгерілету, сондай-ақ білім, ғылым, цифрландыру, жасанды интеллект және «жасыл» экономика бағыттарындағы ынтымақтастықты кеңейту алдағы кезеңнің басым бағыттары ретінде белгіленді.

Дөңгелек үстел қорытындысы тараптардың саяси диалогты жүйелі түрде жалғастырып, практикалық әріптестікті нақты жобалар арқылы тереңдетуге өзара мүдделі екенін тағы бір мәрте айқындады.