Өзбекстан Президентінің сыртқы саясат мәселелері жөніндегі арнайы өкілі Абдулазиз Комилов Брюссель қаласына жасаған сапары барысында Еуропалық комиссия төрағасының Атқарушы кеңсесінің саяси үйлестіру және басқару бөлімінің директоры Живка Петковамен кездесті.

Онда Өзбекстан-Еуропа қарым-қатынастарды одан әрі тереңдету және өңірлік форматта практикалық ынтымақтастықты дамыту мәселелері бойынша пікір алмасу болды.

Тараптар Өзбекстан мен Еуропалық Одақ арасындағы 2022 жылдың 6 шілдесінде парафланған кеңейтілген серіктестік пен ынтымақтастық туралы келісімге қол қоюға мүдделі екендіктерін білдірді.

«Сұхбаттасушы Өзбекстан тарапының климаттың өзгеруімен күресу және оның жағымсыз салдарын азайту жөніндегі күш-жігерін жоғары бағалады. Ол сондай-ақ Өзбекстанның биылғы жылы Самарқандта халықаралық климаттық форум өткізу туралы бастамасын қолдайтынын жеткізді», делінген хабарламада.

Ведомство дерегінше, маңызды шикізат саласында тиісті меморандум жасау арқылы өзара ынтымақтастықты дамытудың өзектілігі айтылған.

Тараптар екіжақты және өңіраралық сипаттағы алдағы бірлескен іс-шаралар кестесін де талқылаған.