Буюк Британия технология вазири Питер Кайл мамлакатнинг сунъий интеллект (СИ) соҳасидаги етакчи тадқиқот муассасаси – Алан Тюринг институти (АТИ)дан мудофаа ва ҳарбий технология йўналишидаги ишларга алоҳида эътибор қаратишни сўради. Бу ҳақда “Guardian” газетаси ёзган.

– Тараққиётга қараб, мудофаа ва миллий хавфсизлик лойиҳалари АТИ фаолияти ўзагига айланиши керак ва шунга мос равишда хавфсизлик, мудофаа ва разведка хизмати билан ҳамкорликни кучайтириш зарур, – деб ёзган нашр Кайлнинг институтга йўллаган мактубидан парча келтириб.

Мулозим таъкидлашича, бунинг учун институтда таркибий ислоҳот ўтказилиши, раҳбарият ўзгариши лозим. Шундан сўнг мудофаа, миллий хавфсизлик ва сунъий интеллект соҳасидаги суверенитетни биринчи ўринга қўйиш талаб этилади.

Ҳукуматдан номинал мустақил ҳисобланган бу компанияга “Amazon”нинг Буюк Британиядаги бўлинмаси собиқ раҳбари Даг Гурр раҳбарлик қилади. Давлат томонидан молиялаштирилаётган институтда аллақачон қайта қуриш жараёни бошланган ва қатор ходимлар ишдан бўшатилган. 2024 йил охирида ўтказилган сўров кўрсатди-ки, ҳар бешинчи ходим ислоҳот АТИ ишончлилигига путур етказиши мумкин, деб ҳисоблайди.

С.Раҳимов, ЎзА