Президентимизнинг Наманган вилоятига ташрифида белгиланган топшириқлар ижросини таъминлаш мақсадида, Тўрақўрғон туманидаги “Наманган” эркин иқтисодий зонасида жойлашган “Ифтиҳор кийим саноат” масъулияти чекланган жамиятга қарашли янги корхонада “Наманган – глобал брендлар билан ишлаш бўйича чемпион ҳудуд” шоири остида ўтказилган саноат кўргазмасида вилоятдаги 80дан зиёд корхоналар миллий ҳамда хорижий брендлар учун тикилган тайёр кийимлар ҳамда озиқ-овқат, чарм, қурилиш материаллари, фармацевтика маҳсулотлари кўргазмаси билан иштирок этди.
Вилоят шаҳар ва туманлардан келган нуронийлар, меҳнат фахрийлари, маҳалла фаоллари, ёшлар вакиллари ушбу саноат кўргазмаси фаолияти билан яқиндан танишди. Айниқса, кўргазмадан жой олган Наманганда фаолият юритаётган “Idim”, “Ideal”, “Fazman”, “D.Maretti”, “Imir” каби йирик текстиль корхоналари томонидан 40 дан ортиқ хорижий брендларга ишлаб чиқарилаётган бежирим либослар кўпчиликда катта таассурот қолдирди.
Таъкидлаш жоиз, Фарғона водийсидаги йирик ишлаб чиқарувчилардан саналган “Ифтихор кийим саноат” кластерида йирик брендлар билан ҳамкорликка алоҳида эътибор қаратилмоқда. Хусусан, “Bugatti”, “Pierre Cardin”, “Roy Robson”, “Baldessarini”, “Lavard”, “Jake’S”, “Engbers”, “Cinque”, “Walbusch” сингари йигирмага яқин машҳур брендлар буюртмаларига асосан маҳсулот тайёрланмоқда. Демак, ўзимизда тикилган кийимлар Европа бозорларини эгалламоқда.
Аввалига оддий тикувчилик цехи сифатида иш бошлаган “Ифтихор кийим саноат” бугун пахта етиштиришдан тортиб, тайёр маҳсулотни экспортга йўналтираётган йирик кластерга айланди. Жамият томонидан эркин иқтисодий зонадаги йирик лойиҳаси тўлиқ қувватга чиққач, йилига 100 миллион долларлик маҳсулот ишлаб чиқарилади. Бунинг натижасида, икки мингта янги иш ўринлари яратилади, давлат бюджетига эса йилига салмоқли солиқ тушумлари қўшилади. Халқаро брендлар билан ҳамкорлик маҳсулотга кафолатли бозор, катта валюта тушумлари ва янги иш ўринларини таъминлайди.
Кўргазмада қатнашган Наманган вилоят ҳокими Шавкат Абдураззоқов давлатимиз раҳбарининг вилоятга икки кунлик ташрифи том маънода Наманганда иккинчи уйғониш даврини бошлаб берганлигини эътироф этди.
Дарҳақиқат, Наманган тўқимачилик бўйича республикамизда етакчи. Вилоят саноатининг учдан бири, экспортининг ярими шу соҳага тўғри келади. Ҳозирда ишлаётган 2 минг 500 га яқин тўқимачилик корхоналари 250га яқин брендлар остида маҳсулот тайёрлаб, юз мингдан ортиқ инсонни юқори даромад билан таъминламоқда.
Шу жойнинг ўзида бир пиёла чой устида бўлиб ўтган “Уч авлод учрашуви”да юртимиз шонини халқаро майдонларда муносиб ҳимоя қилиб, оламшумул муваффақиятларга эришаётган Янги Ўзбекистоннинг иқтидорли ёшларининг ютуқлари муносиб рағбатлантирилди.
Жумладан, яқинда Англиянинг Ливерпул шаҳрида бўлиб ўтган бокс бўйича жаҳон чемпионатида мамлакатимиз терма жамоаси таркибида қатнашиб, 75 килограммгача вазн тоифасида дунё чемпионликни қўлга киритган учқўрғонлик Фазлиддин Эркинбоев ҳамда унинг мураббийига вилоят ҳокимининг ташаккурномаси ва қимматбаҳо совғалари тақдим қилинди.
Оқилхон Дадабоев, ЎзА