Футбол бўйича уч карра жаҳон чемпиони Пеле тўсатдан касалхонага ётқизилди, деб хабар тарқатди ESPN нашри.

Бразилиялик афсонавий футболчи Альберт Эйнштейн номидаги касалхонага режадан ташқари ётқизилган, чунки у аввалроқ текширувдан ўтган эди. Собиқ футболчига тана шишиши, юрак етишмовчилиги ҳамда ҳаёли паришонлик ташхислари қўйилган эди.

Хабарда келтирилишича, яқинда амалга оширилган химиотерапия натижа бермаган. Айни пайтда Пеле шифокорлар назоратидан ўтказилмоқда, яқин орада касалхонадан чиқиши кутилмаяпти, дейилади хабарда.

Унинг касалхонага ётқизилганини рафиқаси Марсия ҳам тасдиқлаган. Пеле ҳозир 82 ёшда, 2022 йилда у икки марта Альберт Эйнштейн номидаги клиникага ётқизилганди. Ўшанда у ичак, жигар ва ўпкасидаги ўсимталар бўйича текширувдан ўтказилган.