Хавфсизлик ходимлари “CNN Brasil” телеканалига берган интервьюсида Рио-де-Жанейрода уюшган жиноятчиликка қарши олиб борилган йирик амалиётда 64 киши, жумладан тўрт нафар полиция ходими ҳалок бўлганини маълум қилди.

Расмийлар таъкидлашича, рейд давомида камида 42 ўқ отар қурол ва кўп миқдорда гиёҳванд модда мусодара қилинган.

Штат губернатори ижтимоий тармоқда полиция ҳаракатини “Рио-де-Жанейро тарихидаги энг йирик амалиёт”, деб атади. Дарвоқе, ушбу шаҳар келаси ҳафта иқлим ўзгаришига бағишланган йирик халқаро конференция - C40 Жаҳон мэрлари саммитига мезбонлик қилади.

Ҳукумат маълумотига кўра, амалиётга бир йилдан кўп вақт давомида тайёргарлик кўрилган. 2500 дан ортиқ ҳарбий ва полиция ходими иштирок этган жараёнда 81 киши ҳибсга олинган.

Полиция жиноий гуруҳ аъзолари қаршилик кўрсатиш чоғида дронлардан ҳам фойдаланганига урғу берган. 

С.Раҳимов, ЎзА