Сәрсенбі күні Бразилиа қаласында Жоғарғы сот ғимаратының жанында жарылыстар болды. Жарылыстардан кейін сот ғимараты эвакуацияланып, алаңда ер адамның мәйіті табылды.

ВВС мәліметінше, алғашқы жарылыс сот ғимаратына жақын жерде орналасқан автотұрақтағы көліктің жүксалғышында болған. 20 секундтан кейін екінші жарылыс орын алған. 

Сот ғимаратының алдындағы алаңда ер адамның денесі табылды. Билік мәліметінше, ол Жоғарғы сотқа кіруге тырысқан. 

«Бұл азамат Федералды Жоғарғы сот ғимаратына жақындап, кіруге әрекет жасаған, бірақ кіре алмаған. Содан кейін кіреберіс маңында жарылыс болды», – деп мәлімдеді Бразилиа губернаторы Селина Леао журналистерге. 

«Бұл жағдайды біз өзін-өзі өлтіру ретінде қарастырып отырмыз, себебі құрбан біреу ғана. Дегенмен, шынайы мән-жайды тергеу анықтайды», – деп қосты ол.

Билік мәліметінше, автотұрақтағы алғашқы жарылысты да осы ер адам жасаған. Жергілікті БАҚ жарылғыш құрылғы сол адамның көлігінде болғанын хабарлады.

Полиция оқиға орнын қоршап, мәйітті тексеру үшін сапер-робот қолданған.

Қайтыс болған адам 59 жастағы Франциско Вандерли Луис. Ол 2020 жылы өзі тұрған Риу-ду-Сул қаласында Либерал партия атынан қалалық кеңеске депутаттыққа үміткер болған. Оқиға алдында ер адам WhatsApp арқылы жарылыс жоспарын егжей-тегжейлі баяндап, полицияға 72 сағат уақыт бар екенін ескерткен.