Ноқонуний товар-моддий бойликларнинг юртимиз ҳудудига олиб киришга бўлган уринишларга чек қўйиш божхоначилар олдида турган энг муҳим вазифалардан биридир.

Тошкент шаҳар божхона бошқармасининг “Сирғали” ташқи иқтисодий фаолият божхона пости ходимлари томонидан навбатдаги қонунбузилиши ҳолатларига чек қўйилди.

Жумладан, хориждан келтирилган дон сақлаш учун мўлжалланган ускуналар белгиланган тартибда божхона кўригидан ўтказилди.

Юк эгалари томонидан тақдим этилган божхона юк декларациясида товарлар яхлит битта товар сифатида таснифланиши маълум қилинган, бироқ ўтказилган текширувлар натижасида мазкур ускуналар алоҳида тарзда учта товар сифатида таснифланиши аниқланган.

Натижада, давлат бюджетига 103,4 миллион сўмлик қўшимча божхона тўловлари ҳисобланган.

Навбатдаги ҳолатда эса божхона постига келтирилган ҳужжатларга кўра, болалар мотоцикли ва илгари фойдаланилган газ двигателлари текширувдан ўтказилганида, ҳужжатларда қайд этилмаган 27 дона аккумуляторли болалар автомобиллари борлиги маълум бўлди.

Ҳозирда мазкур ҳолатлар юзасидан суриштирув ҳаракатлари олиб борилмоқда.

ЎзА