Мамлакатимизда мавжуд имкониятлардан оқилона фойдаланиб, ҳудудларнинг экспорт салоҳиятини ошириш ва хорижий инвестицияларни жалб этиб, жаҳон бозорида рақобатбардош маҳсулот ишлаб чиқаришни кенгайтиришга алоҳида эътибор қаратилмоқда.

Бу йўналишдаги ишлар самарадорлигини оширишга божхона органлари ҳам муносиб улуш қўшиб, жойларда барпо этилаётган йирик лойиҳаларни атрофлича ўрганмоқда. Хориж инвестициясини жалб этиш ва самарали ўзлаштирилишини таъминлашни мувофиқлаштириб, уларга амалий ёрдам кўрсатмоқда.

Сурхондарё вилоятидаги “Бандихон Агрокластер” масъулияти чекланган жамиятининг хориж сармояси иштирокидаги ип-калава ишлаб чиқариш ва тўқимачилик фабрикаси тумандаги йирик лойиҳалардан бири. Бу ерда хорижлик ҳамкорлар билан қиймати 188,7 миллиард сўмлик сунъий тола ва пахта толаси аралашмасидан ип-калава ишлаб чиқариш ҳамда тўқимачилик фабрикаси ташкил этилган. 600 кишининг бандлиги таъмиинланган.

Сурхондарё вилоят божхона бошқармаси бошлиғининг биринчи ўринбосари X.Холбаев Бандихон туманида бўлиб, мазкур корхона билан яқиндан танишди. Замонавий технологияларни кўздан кечириб, ишлаб чиқариш қуввати ва экспорт салоҳиятини ошириш йўлида олиб борилаётган ишларни ўрганди.

Ўтган йили корхона хориждан қиймати 11,5 миллион долларлик замонавий тўқимачилик ускуналарини олиб келиб ўрнатди. Технологиялар соддалаштирилган ва тезкор тартибда божхона расмийлаштирувидан ўтказилиб, божхона органлари қонунчилик доирасида барча зарур ёрдамни кўрсатди. Янги корхонага 16,8 миллиард сўмлик божхона тўловлари бўйича имтиёз қўлланилди. Бу эса лойиҳа харажатларини сезиларли камайтириб, ишлаб чиқариш жараёнининг эрта бошланишига имконият яратди. Натижада ўтган йили корхона Покистон ва Россия давлатларига қиймати 401,8 минг долларга тенг 184 тоннадан ортиқ ип-калава маҳсулотини экспорт қилди. Дастлабки йилдан маҳсулот сифати ва рақобатбардошлигини кўрсатиб, халқаро бозордаги ишончли ҳамкорликни мустаҳкамлади. Жумладан, якунланган йилнинг июнь ойида замонавий корхона яна бир муҳим ишга қўл урди. Қиймати 83,8 минг долларлик 76,2 тонна полиэстер қисқа толали хомашё маҳсулотини “божхона ҳудудида қайта ишлаш” божхона режимига расмийлаштирди. Айни пайтда бу маҳсулотни Хитой ва Туркиядаги буюртмачиларига жўнатишга ҳозирлик кўрмоқда.  

Вилоят божхона бошқармаси бошлиғининг биринчи ўринбосари X.Холбаев корхона билан яқиндан танишиш жараёнида мутасаддиларнинг ишлаб чиқариш қуввати ва экспорт салоҳиятини янада ошириш бўйича режа ва таклифларини тинглади. Жаҳон бозорида харидоргир маҳсулотлар ишлаб чиқариш ҳажмини кенгайтириш юзасидан тавсияларини билдирди.  

Холмўмин Маматрайимов,

ЎзА мухбири