БМТнинг гиёҳванд моддалар ва жиноятчиликка қарши кураш бошқармаси делегацияси аъзолари “Олот” чегара божхона пости фаолияти билан танишди.

Меҳмонлар постнинг назоратдан ўтказиш пунктлари, замонавий инспекцион кўрик мажмуаси ва унинг ишлаш тартиби, божхона органларида жорий этилган “Хавфни бошқариш автоматлаштирилган ахборот тизими” нинг афзалликлари билан  таништирилди.  

Шундан сўнг, делегация аъзоларининг Марказий Осиёдаги чегара алоқалари идораларининг салоҳиятини кучайтириш орқали минтақавий ҳамкорликни мустаҳкамлаш лойиҳаси доирасидаги UNODCнинг 2022-2025-йилларга мўлжалланган Марказий Осиё давлатлари учун тайёрланган дастурини тақдимоти ўтказилди.

– Гиёҳванд моддалар ноқонуний айланмасига қарши курашиш самарасини фақатгина наркотикларни аниқлаш билан эмас, балки инсонларнинг ҳаётини асраб қолиш билан баҳолашни истаган бўлар эдим, –дейди  лойиҳа доирасида сўзга чиққан БМТнинг гиёҳванд моддалар ва жиноятчилик бўйича бошқармасининг Марказий Осиё бўйича минтақавий вакили Ашита Миттал хоним ўз нутқида.

Шунингдек, Япониянинг Ўзбекистондаги Фавқулодда ва мухтор элчиси Жаноб Ҳатори Такаши ўз нутқида Япониянинг солиқ тўловларидан тушган маблағларни гиёҳванд моддаларга қарши кураш мақсадида ишлатилаётганлигидан фахрланишини таъкидлаб, мазкур йўналишда Божхона қўмитаси билан йўлга қўйилган ўзаро ҳамкорликдан мамнун эканлигини қайд этди.

Маълумот учун, божхона органлари ва бошқа хизматлар билан ҳамкорликда сўнгги 1 йил мобайнида 900 килодан ортиқ наркотик моддалар савдосига барҳам берилди. Жумладан, “Ойбек” чегара божхона пости орқали 245 килограмм героин, “Айритом” чегара божхона пости орқали “Анор шарбати” ниқоби остида 103,2 килограмм метамфетаминни олиб ўтишга бўлган уринишлар бартараф этилди.

БМТнинг гиёҳванд моддалар ва жиноятчиликка қарши кураш бошқармасининг “Олот” чегара божхона постидаги расмий офисининг очилиш маросими бўлиб ўтди. БМТнинг гиёҳванд моддалар ва жиноятчилик бўйича бошқармасининг Марказий Осиё бўйича минтақавий вакили Ашита Миттал хоним ҳамда Божхона қўмитасининг Бухоро вилояти божхона бошқармаси бошлиғи Баҳодир Қутлимуратовлар мазкур йўналишда ўзаро ҳамкорликни янада мустаҳкамлашга келишиб олди.

Зариф Комилов, ЎзА