Наманган вилояти божхона бошқармаси бошлиғи, подполковник Умиджон Қодиров томонидан вилоят ҳудудидаги ташқи иқтисодий фаолият қатнашчилари – экспортёр корхоналар мутасаддилари билан сайёр учрашувлар ўтказилди.

Дастлабки манзил Наманган шаҳрида фаолият олиб бораётган “Osiyo home тех” масъулияти чекланган жамиятда бўлди. Мазкур корхона ип-калава маҳсулотларидан ётоқхона чойшаблари ишлаб чиқариш ва экспорт қилиш билан шуғулланади.

Мулоқотда жамият раҳбари тарафидан Туркманистон Республикасидан олиб келинган пахтали матоларни божхона ҳудудида қайта ишлаш божхона режимига расмийлаштириш юзасидан мурожаат қилинди. Бу бўйича батафсил тушунчалар берилиб, шу жойнинг ўзида қайта ишлашга рухсатнома расмийлаштирилди.

Ушбу имконият натижасида, битта автотранспорт воситасида олиб келинган матоларни эркин муомалага чиқаришда тўланадиган 218 миллион сўмдан зиёд маблағ тежалишига эришилади.

“General lift system” масъулияти чекланган жамиятда ўтказилган учрашувда “Божхона ҳудудида қайта ишлаш” режимининг имкониятлари корхона раҳбарида катта қизиқиш уйғотди.

“Jahan metal servis” масъулияти чекланган жамиятда ташкилланган мулоқот ҳам қизғин руҳда кечди. Ушбу мулкчилик субъектига қарашли корхона металл профиллардан темир йўл қурилиши учун маҳсулотлар ишлаб чиқаришга ихтисослашган.

Жорий йилнинг биринчи чораги давомида вазни 220,9 тоннага тенг бўлган, қиймати 262,1 минг доллар миқдоридаги металл профиллар олиб келинган. Товарларни қайта ишлаш натижасида вазни 177,8 тонналик, 373,7 минг доллар қийматга эга тайёр товарлар экспорт қилинган.

Оқилхон Дадабоев, ЎзА