Юртимизда ишлаб чиқарилган ва етиштирилган маҳсулотлар экспорти эвазига давлатимиз бюджетига валюта тушумини таъминлаш бугун янада долзарб аҳамиятга эга.

Божхона ходимлари эса бу борада тадбиркорлик субъектларига ҳар томонлама амалий ёрдам кўрсатиб, мамлакатимиз ташқи савдо айланмасини ташкил этувчи экспорт ва импорт товарларининг тез фурсатларда ҳеч қандай тўсиқларсиз божхона расмийлаштирувидан ўтказилишида таянч бўлмоқда.

Қорақалпоғистон Республикаси Божхона бошқармаси ахборот хизматининг маълум қилишича, биргина “Тўрткўл” ташқи иқтисодий фаолият божхона пости орқали жорий йилнинг январь-апрель ойлари мобайнида 3 миллион 169 минг АҚШ доллари қийматидаги 2124 тонна товарнинг экспорти амалга оширилган. Мазкур пост орқали 73 та ташқи иқтисодий фаолият қатнашчисига яқиндан кўмак берилган.

Хусусан, ўтган давр оралиғида экспортга чиқарилган жами 1 миллион 686 минг АҚШ доллари қийматидаги 800 тоннадан ортиқ ип-калава маҳсулотининг 45 фоизи МЧЖ шаклидаги “BERUNIY TEXTILE INVEST”, 25 фоизи “BOʻSTON CLUSTER” LLC, 20 фоизи “BOSTON MEGA TEXTILE” корхоналари ҳиссасига тўғри келади. Шунингдек, кунжут йирик миқдорда экспорт қилинаётган маҳсулотлардан ҳисобланиб йил бошидан 1 миллион 140 минг АҚШ доллари қийматидаги 618 тонна маҳсулот жами 4 та ташқи иқтисодий фаолият иштирокчиси томонидан ташқи бозорга олиб чиқилган.

Юртимизда етиштирилган қишлоқ хўжалик маҳсулотлари, мева-сабзавотларнинг ички бозорлардан ортган қисмини дунё бозорларига экспорт қилиш борасида ҳам “Тўрткўл” ташқи иқтисодий фаолият божхона пости салмоқли ўринга эга. Жорий йилнинг ўтган давр оралиғида мазкур божхона пости орқали 75 минг 340 АҚШ долларлик 198 тоннадан зиёд қишлоқ хўжалик маҳсулоти экспорт божхона режимига расмийлаштирилган.

Тўрткўл туманидаги шиша идишлари экспорти билан шуғулланувчи “TOʻRTKOʻL SHISHA IDISHLARI” масъулияти чекланган жамияти фаолиятини яқинда бошлаган бўлишига қарамасдан, қарийб 76 минг АҚШ доллари миқдоридаги 288 тонна маҳсулот экспорт қилган. Бугунги кунда корхона яқин келажакда янги ташқи бозорларга кириб бориши бўйича шартномаларга эга бўлиб, ҳозирда шиша ишлаб чиқариш ҳажмини янада кўпайтириб, аҳоли бандлиги бўйича кенг кўламли ишларни амалга оширмоқда.

Бу рўйхатни яна узоқ давом эттириш мумкин. Барчасидан мақсад аниқ: бугунги синовли кунларга қарамасдан, мамлакатимизда ташқи иқтисодий фаолият иштирокчиларига яратилган имконият ва очилган йўллардан самарали фойдаланиб, давлатимизнинг экспорт салоҳиятини янада ошириш йўлида шижоат билан меҳнат қилиш ҳамда иқтисодиётимиз хавфсизлигини таъминлашда юртбошимизга елкадош бўлишдир. Бу каби эзгу мақсад сари ҳаракатланишда божхона ходимлари тадбиркорлик субъектларига таянч бўлиб, уларга амалий ёрдам кўрсатиб келмоқда.