Айни кунларда Самарқанд шаҳрида бўлиб ўтаётган ЮНЕСКО Бош Ассамблеясининг 43-сессияси иштирокчилари кўҳна ва боқий Бухорога келди.

Меҳмонлар вилоят туризм бошқармаси мутасаддилари иштирокида тантанали тарзда кутиб олинди.

Делегация таркибида АҚШ, Франция, Италия, Испания, Филиппин, Бразилия, Бруней, Ирландия, Руминия, Қирғизистон, Чили, Голландия, Тунис, Котдивар, Хитой, Вьетнам, Япония, Буюк Британия, Мексика, Молдавия, Коста Рика, Марокаш каби 20 дан ортиқ давлатлардан келган иштирокчилар бор.

Шунингдек, ЮНЕСКО сессияси иштирокчилари – Бангладеш ва Эрон мамлакатларининг вазирлари ҳамда элчилари вилоятга ташриф буюрди. Меҳмонлар тегишли масъуллар томонидан самимий кутиб олинди.

Ташриф чоғида Бухоро давлат университетида учрашув ўтказилиб, улар ёшларга ўзларининг қимматли маслаҳатларини беришди.

Шунингдек, меҳмонлар Бухоронинг тарихий марказидаги Пойи Калон ансамбли, Лаби Ҳовуз мажмуаси, қадимий савдо тоқлари, Исмоил Сомоний мақбараси, шунингдек, халқаро биеннале ўтаётган объектлар бўйлаб саёҳат қилди.

Меҳмонларнинг ташрифи давом этмоқда.

Зариф Комилов, Тоҳиржон Истатов, (сурат), ЎзА мухбирлари.