Боливия соты жемқорлық ісі бойынша сотты күтіп отырған бұрынғы президент Луис Арсені 5 ай мерзімге қамауда қалдыру туралы шешім қабылдады.

ABC басылымының мәліметінше, бұл шешім елдегі саяси дағдарысты одан әрі ушықтыруы мүмкін.

62 жастағы Арсе — Боливиядағы «Социализмге қозғалыс» партиясының жетекшісі. Ол 2020 жылы ел президенті болып сайланған, алайда бір ай бұрын оның орнын соңғы жиырма жылда алғаш рет сайлауда жеңіске жеткен оңшыл партияның өкілі басты.

Арсе қызметтік өкілеттігін асыра пайдалану және қаржылық алаяқтыққа қатысты тағылған барлық айыптауларды үзілді-кесілді жоққа шығарып отыр. Егер кінәсі дәлелденсе, ол 6 жылға дейін бас бостандығынан айырылуы мүмкін.

Бұрынғы президент ел астанасы Ла-Паста қамауға алынғаннан кейін екі күн өткен соң, судья виртуалды отырыс барысында оны қамауда ұстау жөнінде қаулы шығарды.

Арсе мемлекеттік қордан миллиондаған долларды жеке есепшоттарға аударды деп айыпталып отыр. Бұл әрекеттер Эво Моралес президент болған кезеңде, яғни Арсе экономика министрі қызметін атқарған 2006–2017 жылдарға сәйкес келеді, делінген хабарламада.