26 маусымда генерал Хуан Хосе Сунига бастаған Боливия армиясының бөлімшелері ел астанасы Ла-Пастың орталық алаңын басып алды және броньды техникаларды пайдалану арқылы республика президенті Луис Арсенің ресми резиденциясының ауласындағы есікті бұзып кіруге әрекеттенді.

Associated Press хабарлауынша, осыдан кейін президент әскери қолбасшының алдына шығып, сөйлескен.

Біраз уақыттан кейін әскерилер президент сарайынан шегініп, оның алдындағы алаңды президент жақтастары басып алды. Көтерілісші генералды полиция ұстады.

Боливия вице-президенті Дэвид Чокехуанка әлеуметтік желіде «Біз халықаралық қоғамдастыққа Боливияда демократиялық жолмен сайланған үкіметімізге қарсы мемлекеттік төңкеріс жасау әрекеті болғанын хабарлаймыз» деп жазды. 

Өз кезегінде республика президенті генерал Сунига бөлімшелерінің әрекетін мемлекеттік төңкеріс жасау әрекеті деп атап, полицияға «демократияға берік болғаны үшін» алғыс айтты.