Ҳуқуқий муносабат

Агар бола кетма-кет 3 кундан ортиқ боғчага келмаса, ўша кунлар учун тўлов тўланмайди, агар олдиндан тўланган бўлса, кейинги тўловлар учун ҳисобга олинади.  

Хўш, қайси ҳолатларда тўлов қилиниши шарт эмас?

Тошкент давлат юридик университети Юридик клиника раҳбари Отабек Нарзиев бу борада қуйидагиларни маълум қилди:

– Бу ҳолатда боланинг ёки оила аъзоларининг касаллиги, боланинг ёки оила аъзоларининг карантинда бўлиши ҳамда ота-оналардан бирининг ишдан ёки  ўқишдан бўш вақти ёки бошқа асосли сабабларга, жумладан, оилавий маросимларга кўра бола 3 кундан ортиқ боғчага келмаса, бу кунлар учун тўлов қилинмайди.

Бунда ҳар бир ҳолатни ҳужжат билан тасдиқлаш керак. Хусусан, касаллик варақаси ёки ота-онанинг боғча раҳбариятига ёзма аризаси орқали амалга оширилади.

Шунингдек, ота-она ариза ёзган ҳолда, бола бир йил давомида 60 кунгача боғчага келмаслиги мумкин.

Агар бола боғчага қатнашни бутунлай тўхтатса ва бу ҳақида олдиндан ёзма ариза берилган бўлса, тўлиқ бўлмаган ой учун, яъни бола фақатгина қатнаган кунлари учун тўлов амалга оширилади.

Агар ариза бўлмаса, тўлов тўлиқ ой учун ундирилади.

Демак, мактабгача таълим муассасаси олдиндан ёзма огоҳлантирилган бўлса, бола боғчага бормаган кунлар учун пул тўланмайди.

Асос: Мактабгача таълим ташкилотлари ва мактаб-интернатлардаги болалар таъминотига ҳақ тўлаш тартиби тўғрисидаги низом, 3-боб.

Гулноза Бобоева, ЎзА