Болаликдаги қоғоз самолёт бугун ҳақиқийга айланди
Жиззахлик Азизбек Мухторжонов болалигида учувчи бўлишни орзу қиларди.
Жиззахлик Азизбек Мухторжонов болалигида учувчи бўлишни орзу қиларди. Ўйнайдиган ўйинчоқларининг ҳам аксарияти учувчи техникалар эди. У қоғоздан ясаган самолёт тенгдошлариникига қараганда узоқроқ учарди.
Болаликдаги орзу вояга етганида уни авиация билим юртига бошлаб келди ва бугун қоғоз самолёт ҳақиқийга айланди. Энди у Ўзбекистон Республикаси олий ҳарбий авиация билим юрти битирувчиси, Су-25 самолёти учувчиси...
– Самолёт бошқа техникаларни бошқаришдан анча фарқ қилади, –дейди лейтенант Азизбек Мухторжонов. – Айниқса, у ҳарбий самолёт бўлса. Шу боис билим юртида учувчи техникаларни бошқаришнинг назарий ва амалий қисми мукаммал ўргатилади. Қайта-қайта синовдан ўтказилади. Шундан сўнггина самолёт бошқарувига рухсат берилади. Ўйлайманки, бу ерда ўтган курсантлик йилларим соҳани пухта ўрганишим, учувчилик касбини мукаммал эгаллашимда муҳим аҳамият касб этди. Билим юртида яратилган шароитлар, тажрибали устозлардан олган сабоқларимиз бунга имкон яратди. Келажакда юртимиз сарҳадларини астойдил ҳимоя қилиш йўлида қилган қасамёдимизга содиқ қолишга ваъда бераман.
Айни пайтда Ўзбекистон Республикасининг суверенитетини, ҳудудий яхлитлигини, аҳолисининг тинч ҳаёти ва хавфсизлигини ҳимоя қилиш, жонажон мамлакатимиз равнақи, халқимиз, эркин ва обод юртимиз тинчлиги ва фаровонлигини таъминлашни мақсад қилган олий ҳарбий таълим муассасалари курсантларининг тантанали битирув маросимлари бўлиб ўтмоқда. Мана шундай тадбирлардан бири – Қарши шаҳридаги Ўзбекистон Республикаси олий ҳарбий авиация билим юрти ёш лейтенантларининг навбатдаги 23-битирув кечаси тантанали равишда ўтказилди.
Битирув кечасида билим юртининг 42 нафар лейтенантига диплом ва кўкрак нишонлар топширилди, шулардан 7 нафари имтиёзли диплом билан ўқишни тамомлади.
Тантанали маросимда иштирок этган Жанубий-Ғарбий махсус ҳарбий округи қўшинлари қўмондони, полковник Зайнобиддин Иминов ва бошқалар бугунги кунда давлатимиз раҳбари ташаббуси билан мамлакатимизнинг мудофаа қобилиятини янада такомиллаштириш, замонавий армияни шакллантириш, ҳарбий хизматчиларга яратиб берилаётган имконият ва қулайликлар, интеллектуал салоҳиятли курсантларни тарбиялаш борасида кенг кўламли ишлар олиб борилаётганини алоҳида таъкидлади.
Ўзбекистон Республикаси олий ҳарбий авиация билим юртида янги анъана сифатида киритилган «Битирувчилар йўлаги» яратилиб, тадбир сўнгида давлат ва жамоат ташкилотлари вакиллари ҳамда ўқувчи ёшлар иштирокида битирувчилар тантанали равишда кузатилди.
Битирувчилар йўлагидан ўтиш жараёнидан ёш лейтенантлар томонидан ўқувчи ёшларга «Келажакдаги шогирдим» кўкрак нишонлари топширилди ва рамзий маънода ёшларни ўзларининг издошлари деб эътироф этди.