Болалар миллий тиббиёт марказида янги амалиёт — Ўзбекистон тарихида илк бор ангиоваскуляр усулда абернетти синдромига қарши жарроҳлик муолажаси ўтказилди.

Мутахассисларга кўра, ушбу синдром жуда кам учрайдиган ҳамда болаларда оғир асоратларни келтирибчиқарадиган касаллик ҳисобланади. Бу ҳолатда жигарга келиши керак бўлган қон юракка йўналади ва натижада жигар қон таъминоти бузилиб, у ўз вазифасини тўлиқ бажара олмай қолади.

Самарқандлик 3 ойлик гўдакда шу хасталик аниқлангач, Болалар миллий тиббиёт маркази шифокорлари томонидан у атрофлича текширувдан ўтказилди ҳамда зарур муолажа усули ишлаб чиқилди.  

Жигарнинг қон айланишини тиклаш ва касалликни бартараф этиш, муҳими, бола ҳаётини сақлаб қолишга қаратилган ушбу усул асосида жуда кам учрайдиган хасталик муваффақиятли муолажа қилинди.

Айни пайтда бемор шифокорлар назорати остида тегишли муолажаларни давом эттирмоқда.

М.Қосимова, ЎзА