Bolalar milliy tibbiyot markazida telemeditsina orqali tegishli yo‘nalishlarda onlayn maslahat berish yo‘lga qo‘yildi. Bu orqali nafaqat viloyat, tuman, shaharlar, balki qo‘shni davlatlardagi klinik shifoxonalarda davolanayotgan bemorlarga maslahat berish mumkin.

Kuni kecha Xorazm va Samarqand viloyatidagi markaz filialida davolanayotgan og‘ir ahvoldagi bemorlarga telemeditsina orqali onlayn maslahat berilib, konsilium qilindi. Keyingi tekshirish hamda  davolash choralari kelishib olindi.

Shuningdek, qo‘shni Tojikiston Respublikasining poytaxti Dushanbe shahrida joylashgan klinikada davolanayotgan 2 yoshli bemor markaz va mahalliy mutaxassislar ishtirokida onlayn konsilium qilinib, laborator va instrumental tekshiruvlari, bemorning hozirgi holati hamda boshqa parametrlari bilan tanishildi. Bemor qarindoshlari tashabbusi bilan Bolalar milliy tibbiyot markaziga qayta tekshirish va davolash uchun yotqiziladigan bo‘ldi.

M.Qosimova, O‘zA