Йўлда беихтиёр ёши олтмишга яқинлашиб қолган икки аёлнинг суҳбатига гувоҳ бўлдим.

–Катта неварам 2015 йил 1 февралда туғилган. Маҳалламиздаги мактабга чиқсам, директор «Неварангизни бу йил ўқишга ололмаймиз. Қонун-қоида ўзгарган. 2021-2022 ўқув йилидан 2014 йил 31 декабрга қадар туғилган болаларни олаяпмиз. 6 ёшдан 7 ёшгача бўлган болалар бошланғич таълимга бир йил мажбурий тайёрланади.  Болалар энди 1-синфга етти ёшга тўладиган йилда қабул қилинади», деди. Шундан сўнг ҳеч нима, дея олмай қайтиб келдим, – деди кўзойнак таққан сипо аёл.

–Йўғэ, бўлмаган гап. Сизни алдашибди. Бунақа қонун-қоида йўқ.Ўзлари тўқишган. Буларнинг дарду ҳоли пул. Пул берсангиз, олишади. Яхши мактаблар ҳозир пул бўлиб қолган, – дея гапни илиб кетди ёнидаги аёл. – Менинг неварам 2015 йил майда туғилган. Ҳали кўрасиз, олдираман. Олмасликка ҳаққи йўқ. Мактаб бошлангунига қадар 7 ёшга тўлса, олиши шарт. Бу уларнинг ўйини. Мақсадини боя айтдим-ку.

Ана шу гурунгни эшитиб, ёзгим келди. Биринчи аёлга тўғри айтишган: янги тартиб-қоидани тушунтиришган. Иккинчи аёлнинг гапида ҳам жон бор. Чунки, дарҳақиқат, бурун  агар бола 1 сентябрга қадар 7 ёшга тўлса, мактабга олинган. “Тепа”дан қўнғироқ қилган ёки бошқа бир йўлини топган ота-оналарнинг болалари 31 декабрга қадар туғилганда ҳам мактабга олинган ҳоллар кўп бўлган. Иккинчи аёл бундан бохабар: эшитган ё кўрган. Шу учун қатъий гапиряпти.

Назаримда, кўп ота-оналар ҳали янги тартиб-қоидадан бехабар кўринади. Шу учун яна бир эслатай, дедим.

И. Нусратов, ЎзА