Англиянинг Ливерпуль шаҳрида бокс бўйича катталар ўртасида ўтказилаётган жаҳон чемпионатида Ўзбекистон терма жамоаси аъзолари ҳозирча мағлубият нималигини билмай келмоқда.

Гап шундаки, чемпионатнинг навбатдаги кунида 9 нафар боксчимиз рингга кўтарилди ва уларнинг барчаси муваффақиятга эришди. Жумладан, Жавоҳир Умматалиев -80 кг. вазнда Жанубий кореялик Ким Минсеонгни 5:0 ҳисобида енгди ва чорак финалда қозоғистонлик Нурбек Оралбайга қарши жанг ўтказадиган бўлди.

Асадхўжа Мўйдинхўжаев эса 65 килограммгача вазн тоифасида чорак финал йўлланмаси учун ўтган баҳсда финляндиялик Исмаил Умарни қийинчиликсиз мағлуб этди.  Энди боксчимиз чорак финалда қозоғистонлик Эртуған Зейнулинов билан жанг қилади.

Шунингдек, кун давомида Феруза Казакова, Ситора Турдибекова, Сабина Бобоқулова, Азиза Зокирова, Миразизбек Мирзахалилов, Шодиёржон Мелиқўзиев ва Акмалжон Исроилов каби боксчиларимиз ўз вазн тоифаларида ғалаба қозониб, чорак финал босқичига йўл олди.  

Жавоҳир Тошхўжаев,

ЎзА