Хабар берганимиздек, Иордания пойтахти Амман шаҳрида бокс бўйича катталар ўртасидаги Осиё чемпионати баҳсларининг иккинчи куни ортда қолди.

Бугун, 3 ноябрь чемпионатнинг учинчи кунида боксчи қизларимиздан Хадичабону Абдуллаева ва эркаклар терма жамоаси аъзоси Одилжон Аслонов мусобақадаги иштирокини бошлайди.  

63 килограмм вазнда ғолиблик учун кураш олиб борадиган Абдуллаева таиландлик Сомнуек Панпатчарага қарши жанг ўтказса, 80 кило оғирликдаги боксчимиз Аслонов жанубий кореялик Парк Жин Хун билан чемпионатдаги илк баҳсини ўтказади.  

Кеча бўлиб ўтган учрашувларда ҳамюртимиз Шаҳзод Музаффаров 54 кг. вазнда покистонлик Закир Ҳусайнни томошабинлар сафига кузатиб қўйди. 63,5 кг.да иккинчи учрашувида қозоғистонлик Санатали Толтаевга қарши жанг қилган Руслан Абдуллаев 5:0 ҳисобида ғалабага эришди.  

Кейинги босқичда Музаффаров Камбоджа-Эрон қарама-қаршилигидаги омадли спортчи билан рўбарў келади. Абдуллаев филиппинлик Жамес Паликте билан ярим финал масаласини ҳал этади.  

Эслатиб ўтамиз, қитъа чемпионатида 27 та давлатнинг 181 нафар эркак боксчиси 13 та ҳамда 86 нафар аёл боксчилари 12 та медаллар жамланмаси учун курашларга киришган бўлса, Ўзбекистон эркаклар терма жамоаси тўлиқ, хотин-қиз боксчиларимиз 10 та вазндаги совринли ўринларга даъвогарлик қилмоқда.  

Тўлқин Рўзиев, ЎзА