Mamlakatimizda iqtidorli bokschilarni tayyorlash borasida tizimli tadbirlar o‘tkazilmoqda.

Shu kunlarda Namanganda 2004-2005 yillarda tug‘ilgan yoshlar o‘rtasidagi O‘zbekiston kubogi bahslari va mutaxassislar uchun seminar o‘tkazilayotgan bo‘lsa, boks bo‘yicha mamlakatimiz terma jamoasining 12 nafar a’zosi Rossiya Federatsiyasining Grozniy shahrida Ahmad hoji Qodirov xotirasiga bag‘ishlangan xalqaro turnirda yurtimiz sharafini himoya qilmoqda.

Namanganda o‘tayotgan chempionat doirasidagi hakamlar va mutaxassislar faoliyatini rivojlantirish seminarini O‘zbekiston boks federatsiyasi ijrochi direktori Shohid Tillaboyev va Hakamlar hay’ati raisi Bekjon Yusupov olib bormoqda.

50 nafardan ortiq mutaxassislar qatnashayotgan seminar mashg‘ulotlari ikki kun nazariy, yana ikki kun amaliy mashg‘ulotlarni qamrab oladi.

O‘zbekiston kubogida mamlakatimizning turli hududlaridan 270 nafarga yaqin bokschilar 13 ta vazn toifasida bahslashmoqda. Bellashuvlar 19 avgustga qadar davom etadi.

Rossiya Federatsiyasi Grozniy shahridagi xalqaro turnirda Armaniston, Afg‘oniston, Ozarbayjon, Kuba, Belarus, Qozog‘iston, Qirg‘iziston, Rossiya va mamlakatimizning 100 nafardan ziyod charm qo‘lqop ustalari qatnashmoqda.

Joriy yilning 18 avgustiga qadar davom etadigan musobaqada Hasanboy Do‘smatov, Ruslan Abdullayev, Shodiyor Meliqo‘ziyev singari tajribali sportchilarimiz bilan bir qator yoshlar ham bahslarda qatnashmoqda.

Chechinistondagi xalqaro turnirning ilk kungi janglarida 57 kilogramm vaznda hamyurtimiz Samandar Xolmurodov armanistonlik Alik Karibyan, Ruslan Abdullayev (63,5) chechinistonlik Usman Magomadovni, G‘ofur Tohirov kubalik Gektor Luisni hamda Baxtiyor G‘ofurov afg‘onistonlik Zamir Ahmadiyni, Abdulaziz Abdupattoyev rossiyalik Hasan Bashtigovni mag‘lub etib, keyingi bosqichga yo‘l oldi.

Musobaqalar davom etmoqda.

T. Ro‘ziyev, O‘zA