Хабар берганимиздек, 27 август-10 сентябрь кунлари Бирлашган Араб Амирликларининг Аль-Айн шаҳрида ўсмирлар ва кичик ўсмирлар ўртасида Осиё чемпионати бўлиб ўтди.

Мазкур қитъа биринчилигида ватанимиз спорт шуҳратини улуғлаган ўсмирлар терма жамоамиз Ислом Каримов номидаги Тошкент халқаро аэропортида тантанали кутиб олинди.  

Ўзбекистон бокс федерацияси мутасаддилари, кенг жамоатчилик вакиллари, спорт ташкилотлари мутахассислари кутиб олиш маросимида иштирок этди. Ёш чарм қўлқоп усталаримизнинг эришаётган натижалари эътироф этилди. Мамлакатимизда ўзбек бокс қудратини жаҳонда намойиш этиб келаётган тажрибали спортчиларнинг янги авлоди камолга етаётгани қайд этилди.  

–Париж Олимпиадасида эришган муваффақиятимиздан кейин ўсмир боксчиларимизнинг қўлга киритган ютуқлари мамлакатимизда истеъдодли ёшларни танлаш, саралаш, йўналтириш тизими тўғри йўлга қўйилганини кўрсатди. Ёшларимизнинг кўпчилиги айнан "Тошкент-2025" ёшлар Осиё ўйинларида қатнашишини, улар 2026 йилги Осиё ўйинларида, 2028 йилги Олимпия ўйинларида ватанимиз шарафини ҳимоя қилишга номзод эканини назарда тутсак, режалар тизимли олиб борилаётганидан далолат, – дейди Ўзбекистон бокс федерацияси бош котиби Миршоҳид Тиллабоев.  

Эслатиб ўтамиз, Осиё чемпионатида ўсмир боксчиларимиз 4 та олтин, 6 та кумуш ва 3 та бронза жами 13 та медаль билан умумжамоа ҳисобида 1-ўринни эгаллаб, қитъанинг энг кучли жамоаси эканини намойиш этди.  

Т.Рўзиев,

ЎзА