Мамлакатимиз боксчиларининг бундан тўққиз йил муқаддам Рио-2016, ундан кейин 2019 йили Россия Федерацияси Екатеринбург шаҳрида ўтказилган жаҳон чемпионатидан бошланган ғалабали юриши авлодлар алмашинуви жараёнида собитлик билан давом эттирилмоқда.

Жорий йилнинг 4-14 сентябрь кунлари Буюк Британиянинг Ливерпуль шаҳрида кечган муросасиз жангларга бой жаҳон чемпионатида енгилмас боксчиларимиз 6 та олтин, 2 та кумуш ва 3 та бронза, жами 11 та медалга эга чиқди.  

Йигитларимиз дунё биринчилигида 6 та олтин медалга сазовор бўлиб, тарихий натижа қайд этди.  

Париж-2024 олимпиадасидан кейин деярли янгиланган, ёшарган таркиб билан умум жамоада 1-ўринни эгаллаши эътиборли воқелик бўлди.

Хўш, Ўзбек боксчиларининг доимий тарзда муваффақиятга эришиш имконини топишида, янги-янги чемпионлар авлодининг камолга етказилишида қандай сир-саноат бор?  

Ўзбекистон бокс федерациясида жаҳон чемпионатида юқори натижаларга эришган чарм қўлқоп усталари ва уларнинг мураббийлари иштирокида ўтказилган матбуот анжуманида шу мавзуда ҳамда юртимиз бокс терма жамоасининг кейинги мусобақалари, халқаро турнирлар, ўқув-машғулот йиғинлари, Лос-Анжелес-2028 олимпиадасида терма жамоа таркиби қай кўринишда бўлиши хусусида сўз борди.

Анжуманда иштирок этган мамлакат бокс федерацияси бош котиби Шоҳид Тиллабоев, бокс бўйича Ўзбекистон терма жамоаси бош мураббийи Тўлқин Қиличев, аёллар терма жамоаси катта мураббийи Элшод Расулов, жаҳон чемпионатида ғолибликка эришган боксчиларимиз журналист ва блогерларни қизиқтирган саволларга жавоб беришди. 

<iframe width="640" height="420" src="https://www.youtube.com/embed/XZv1NpuqFuI" title="Muvaffaqiyatning siri nimada?" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Жавоҳир Тошхўжаев, Тўлқин Рўзиев,

Дониёр Якубов, Анвархўжа Аҳмедов (видео), ЎзА