Бугун, 15 январь куни пойтахтимиздаги "Олимпия шаҳарчаси"да бокс бўйича эркаклар ва аёллар ўртасида навбатдаги Ўзбекистон чемпионати баҳслари бошланади.

Кеча чемпионат олдидан ташкил этилган мандат комиссияси йиғилиши ва қуръа ташлаш маросимлари натижасига кўра, чемпионатда 278 нафар боксчи иштирок этиш учун рўйхатдан ўтган. Уларнинг 198 нафари йигитлар, 80 нафари боксчи хотин-қизлардан иборат.

"Лос-Анжелес-2028" сари йўл шу ердан бошланади" шиори остида ўтадиган чемпионат дастурига мувофиқ, 15-17 январь кунлари саралаш, 18-19 январда чорак финал, 20 январь дам олиш куни, 21 январь ярим финал ва 22 январь куни финал жанглари ўтказилиши белгиланган.

Чемпионатнинг чорак финалигача ўтадиган жанглар "Олимпия шаҳарчаси"да, ярим финал ва финал баҳслари "Зўр ТВ"нинг "Ренессанс холл" аренасида ўтказилиши кутилмоқда.

Иштирокчилар рўйхатига эътибор қаратилса, мамлакатнинг энг кучли чарм қўлқоп усталари жам бўлган биринчиликда жаҳон ва Осиё чемпионатларининг ғолиблари, қатор комплекс мусобақалар совриндорлари, Олимпия ўйинлари иштирокчилари қатнашаётгани ҳар бир жуфтликдаги қарама-қаршилик финал жанги даражасида кечишидан далолат бермоқда.

Бугун кун мобайнида кечадиган мусобақаларда 42 та жуфтлик жанги ўтказилади.

Т.Рўзиев,

ЎзА