Бугун, 18 январь куни пойтахтимиздаги "Олимпия шаҳарчаси"да "Лос-Анжелес-2028" сари йўл шу ердан бошланади" шиори остида ўтаётган бокс бўйича эркаклар ва аёллар ўртасидаги Ўзбекистон чемпионатининг тўртинчи кунги жанглари бўлиб ўтади.

198 нафар йигит, 80 нафар боксчи хотин-қизлар қатнашаётган чемпионатнинг ортда қолган уч кунлик баҳсларида умумий ҳисобда 135 та жанг ўтказилди.

Кеча ташкил этилган саралаш мусобақаларида Ўзбекистон эркаклар ва аёллар терма жамоасининг иқтидорли аъзолари Иқболжон Холдоров, Мирзабек Мирзахалилов, Навбаҳор Ҳамидова, Нигина Ўктамова, Феруза Казакова муваффақиятга эришди.

Бугун чорак финалнинг илк кунида боксчи йигитлар ўртасида -50, -55, -65, -75, -80, -90, +90 килограмм вазн тоифасида 40 та жуфтлик жанглари ташкил этилади. Бокс мухлислари кун давомида Асилбек Жалилов, Фарёзбек Дўсматов, Самандар Олимов, Жаҳонгир Зокиров, Мадиёр Саидраҳимов сингари таниқли чарм қўлқоп усталарининг жангларига гувоҳ бўлади. 

Эслатиб ўтамиз, чемпионат дастурига биноан ярим финал ва финал жанглари 21-22 январь кунлари "Зўр ТВ"нинг "Ренессанс холл" аренасида ўтказилиши режалаштирилган.

Т.Рўзиев, ЎзА