Сўнгги йилларда республикамизда пиллачилик соҳасини ривожлантириш, ишлаб чиқариладиган маҳсулотлар турини кенгайтириш, шунингдек, пиллачилик тармоғи корхоналарининг экспорт ва инвестиция фаолиятини ҳар томонлама қўллаб-қувватлаш бўйича комплекс чора-тадбирлар амалга оширилди.

Бу эса пилла хомашёси етиштириш ҳажмини ошириш, уни қайта ишлаш ҳисобига экспортбоп ипак маҳсулотлари ишлаб чиқаришни кўпайтириш, шунингдек, республикамизнинг чекка ҳудудларидаги аҳоли, айниқса, аёллар бандлигини таъминлаш имконини берди. 

Мустақиллигимизнинг 31 йиллиги муносабати билан “Ўзбекипаксаноат” уюшмаси таркибида 29 та пиллани қайта ишлаш ва ипак қурти уруғини тайёрлаш корхоналарини ишга тушириш режа қилинган бўлиб, мазкур корхоналар вилоят ҳамда туманлар кесимида навбати билан фойдаланишга топширилмоқда. Шунга кўра, Тошкент вилояти Бўка туманида "Tashkent silk pro" МЧЖ пиллани қайта ишлаш корхонаси ишга туширилди.  

"Tashkent silk pro" МЧЖ корхонасининг лойиҳа қиймати 1 миллион АҚШ долларини ташкил этади. Корхонанинг пиллани қайта ишлаш линияси йиллик қуввати 72 тоннани, ишлаб чиқарадиган хом ипак миқдори эса 24 тоннани ташкил этади. Ишлаб чиқариладиган ипак момиғи миқдорининг йиллик қуввати 18,4 тоннага тенг.  

Шунингдек, хом ипак экспорт қийматининг йиллик кўрсаткичи 674 минг АҚШ долларини, ишлаб чиқариладиган ипак момиғи экспорт қиймати169 минг АҚШ долларини, корхонанинг жами йиллик экспорт қуввати 843 минг АҚШ долларини ташкил этади. 

Корхона фаолияти давомида 758 нафар доимий ва 8 минг 902 нафар мавсумий иш ўрни яратилиб, туманда жами 9 минг 660 нафар иш ўрни яратилишига эришилади.

Гулноза БОБОЕВА, ЎзА