КХДР аҳолини коронавирусга қарши эмлашга уринмаяпти, агар касалликка қарши ўз вақтида курашилмаса, инфекция тез тарқалиши мумкин, деб баёнот берди БМТ бош котибининг расмий вакили Стефан Дюжаррик журналистлар учун уюштирилган брифингда. "Улар вакцинациялаш учун ҳеч қандай ҳаракатни бошламади. Агар зудлик билан эмалаш ишлари ўтказилмаса, вируснинг тез тарқалиши хавфи катта", – деди Дюжаррик.

Шимолий Корея Марказий телеграф агентлиги апрель ойининг сўнгги кунларида мамлакатда "номаълум безгак” хасталиги тарқалаётгани ҳақида маълум қилган эди. Шимолий Кореядаги давлатга қарашли қатор оммавий ахборот воситалари тарқатган хабарлардан хулоса қилиш мумкинки, мамлакатда коронавирус инфекцияси тарқалган, бироқ тана ҳарорати юқори бўлган беморларнинг қанчаси айнан COVID-19 вирусига чалингани ҳақда маълум қилинмади.

Шимолий Корея ҳукумати ҳатто, Сеулнинг коронавирусга қарши курашда ёрдам кўрсатиш таклифига ҳам эътибор қилмаяпти, дея маълум қилмоқда Жанубий Кореянинг Рёнхап агентлиги Корея Республикаси бирлашиш вазирлиги манбаларига таяниб.

Аввалроқ мазкур вазирлик Сеул КХДРга коронавирусга қарши курашиш учун ёрдам жўнатиш ҳақида хабарнома беришга уриниб кўргани, лекин Шимолий Корея хабарномани қабул қилманини маълум қилганди. Вазирликнинг маълум қилишича, Жанубий Корея КХДРга дори-дармон, тиббий ниқоблар, тест ўтказиш тўпламларини жўнатмоқчи бўлган. Бундан ташқари, Жануб Шимолга технологиялар билан ёрдам бериши ва "коронавирусга қарши курашда ўз тажрибаларини тақдим этишини" ҳам билдирган.

Рёнхап агентлиги манбаларига кўра, Шимолий Корея уч кундирки, Жанубий Кореянинг коронавирусга қарши курашда ёрдам кўрсатиш таклифига эътибор қаратмаяпти.

Жанубий Корея президенти ҳам “Агар Пхеньян рози бўлса ҳеч иккиланмай вакциналар ва бошқа тиббий маҳсулотлар, шунингдек, шифокорларни Шимолий Кореяга жўнатишга тайёр эканини айтганди.