BMT jahon hamjamiyatini zilziladan jabr ko‘rgan afg‘onistonliklarga 110 million dollar ajratishga chaqirdi
Ushbu mablag‘ uch oy davomida Paktika va Xost viloyatlarida zilziladan jabr ko‘rgan 362 ming kishini qo‘llab-quvvatlash imkonini beradi, dedi Jenevada bo‘lib o‘tgan brifingda BMTning gumanitar masalalarni muvofiqlashtirish boshqarmasining rasmiy vakili Yens Larke.
Larkening izoh berishicha, “mazkur mablag‘ joriy yilda ko‘zda tutilgan 4,4 milliard dollarlik gumanitar rejaning muhim qismi hisoblanadi”. 22 iyun kuni tunda Afg‘onistonning G‘azni, Kobul, Lag‘man, Logar, Paktika va Xost viloyatlarida dahshatli zilzila ro‘y berdi.
Afg‘oniston ommaviy axborot vositalari ma’lumotlariga ko‘ra, falokat mingdan ziyod kishining yostig‘ini quritgan, ikki mingga yaqin kishi jarohat olgan.