Бирлашган Миллатлар Ташкилотининг демократик ва адолатли халқаро тартиб ўрнатилишига кўмаклашиш масаласи бўйича махсус маърузачиси Георгиос Катругалос фикрича, Ғазо секторидаги тажовуз даврида Европадан Исроилга қурол етказиб бериш давом этиши жуда ташвишли.

Грециялик ҳуқуқшунос ва сиёсатчи, ташқи ишлар вазири лавозимида ишлаган ушбу дипломат исроиллик ҳарбийларнинг эксклавдаги ҳаракати кўплаб тинч аҳоли, жумладан аёллар ва болалар қурбон бўлишига олиб келганини таъкидлаган. Халқаро ҳамжамиятни Исроилга зудлик билан ўт очишни тўхтатиш учун босим ўтказишда фаолроқ позиция эгаллашга чақирган.

Жаноб Катругалос Халқаро суднинг Исроил Фаластин ҳудудини босиб олгани ноқонуний деб топилган сўнгги қарорлари Ғарбий Соҳил ва Ғазо секторига тегишли эканини эслатди.

БМТ вакили таъкидлашича, халқаро босим вазият янада ёмонлашишининг олдини олиши мумкин.