29 август куни БМТ матбуот хизмати ушбу хабарни тарқатди.

«29 август ҳолатида буғдой ва бошқа озиқ-овқат маҳсулотларининг умумий миқдори 1 миллион 289 минг 65 тоннани ташкил этди. Юклар Украинанинг учта портидан экспорт қилинмоқда. Ҳозиргача жами 122 кемага юк ташишга рухсат берилган. Уларнинг 67 таси Украина портларига кираётган, 55 таси чиқаётган кемалардир», — дейилади хабарда.

Шунингдек, хабарда таъкидланишича, Қўшма мувофиқлаштирувчи марказ (ҚММ) томонидан 30 август куни яна олтита кемага 121 минг тоннадан кўп озиқ-овқат маҳсулотларини олиб чиқиш учун рухсат берилган.

Россия мудофаа вазири Сергей Шойгу ва БМТ бош котиби Антониу Гутерриш 22 июлда Россиядан жаҳон бозарига қишлоқ хўжалиги маҳсулотлари ва ўғит етказиб бериш бўйича меморандум имзолаганди. Россия вазирининг аниқлик киритишича, мазкур ҳужжат экспортга қўйилган чекловни бекор қилишга БМТни жалб қилишни назарда тутади. Шу билан бир вақтда, Украина делегацияси Туркия ва БМТ билан буғдой экспорт қилиш бўйича битим имзолади.

Хабарда келтирилишича, шу вақтгача Туркияга 16 та, Италияга тўртта, Жанубий Кореяга учта кема келган. Шу билан бирга, Руминия, Хитой, Миср, Исроил, Нидерландияга иккитадан, Ирландия, Эрон, Греция, Ливия ва ГФРга биттадан юк кемаси етиб келган.