Россиянинг Украинага бостириб кириши ортидан 100 мингдан ортиқ тинч аҳоли ўз уйини ташлаб кетган.

 Бу ҳақда БМТ Қочқинлар бўйича Олий комиссарлиги матбуот котиби Шабиа Манту ташкилотнинг Женевадаги офисида бўлиб ўтган матбуот анжуманида маълум қилди.

— Биз 100 мингдан ортиқ украиналик уйини ташлаб кетган ёки ички кўчишга мажбур этилган бўлиши мумкин, яна бир неча минг киши халқаро чегараларни кесиб ўтган, деб ҳисоблаймиз  — деди матбуот котиби.

— БМТ ходимлари уйидан чиқиб кетган украиналикларга ёрдам кўрсатмоқда, — қўшимча қилди Манту.

У Украинадаги вазият янада кескинлашган тақдирда 4 миллионгача одам мамлакатни тарк этиши мумкинлигидан ҳам огоҳлантирди.

Ўз навбатида Бирлашган Миллатлар Ташкилоти Инсон ҳуқуқлари бўйича Олий комиссари бошқармаси расмий вакили Равина Шамдасани Россиянинг Украинадаги ҳаракатлари натижасида 25 нафар тинч аҳоли вакили ҳалок бўлгани, 102 киши жароҳат олганини маълум қилди.
БМТ вакиллари Россиянинг ҳарбий амалёти халқаро ҳуқуқ нормаларига зид эканини таъкидлади ва операция сон-саноқсиз одамлар ҳаётни хавф остига қўйганини айтди. Бундан ташқари, урушга норозилик билдириб, акция уюштирган Россиядаги талабаларнинг ўзбошимчалик билан ҳибсга олинишидан хавотир билдирди.

— Биз 1800 дан ортиқ намойишчи ушланганидан хабардормиз. Улар озод этилганми ёки йўқ, ҳозирча номаълум, — деди Шамдасани.

Қочқинлар бўйича Олий комиссарлик вакили ҳибсга олинган намойишчиларни зудлик билан озод қилишни талаб қилди.