АҚШнинг собиқ Президенти Дональд Трампга қарши даъво ишини кўриб чиқаётган Нью-Йорк судига портлаш хавфи ҳақида хабар келиб тушган.

Натижада суд иши тўхтатилди, деб ёзмоқда Bloomberg агентлиги. 

“Манхэттенда Нью-Йорк прокурори Летиция Жеймснинг Трампга қарши 250 миллион долларлик даъво аризаси кўриб чиқилаётган чоғи қўпорувчилик таҳдиди ҳақида хабар келган”, — деб ёзган  агентлик. 

Суд иши вақтинчалик тўхтатилган, лекин  текширув натижасида таҳдид ўз исботини топмади, дейилади хабарда.  

Жеймс 2022 йил сентябрда Трамп ва унинг болаларига ҳамда улар билан боғлиқ компанияларга қарши 250 миллион долларлик даъво аризасини берган эди.  

Даъвогар Трамп оиласини фирибгарликда ва ёлғон маълумотлар берганликда гумон қилаётганини маълум қилган. Ўшанда Жеймс АҚШнинг собиқ президентини бир йўла бир нечта штатлар қонунларини бузганликда, жумладан, ҳужжатларни қалбакилаштиришгани, молиявий ҳисоботларни сохталаштиргани, суғурта фирибгарликларида иштирок этгани, гаровга фоиз олгани ва солиқни кам тўлагани бўйича   айблаган эди.  

Манхэттен судида Трампга қарши яна бир суд иши ҳам кўриб чиқилмоқда. Мазкур суд иши доираси Трампга актриса Сторми Дэниэлс билан ишқий муносабатлар бўйича айблов эълон қилиниши мумкин.

Хабарда айтилишича, актрисага гўё жим юриши учун йирик пул  тўланган. Собиқ президентнинг ўзи эса Дэниэлс  билан алоқада бўлганлиги ҳақидаги маълумотларни рад этиб, ўз томонидан ҳеч қандай қонунбузарликка йўл қўйилмаганини таъкидламоқда.  

Хуллас, Дональд Трампнинг навбатдаги президент сайловида номзод кўрсатиши, айниқса, унда ғолиб бўлиши савол остида қолаётган масалага айланмоқда.